Kan ram dinhmun leh ram hruaitu

Keini ang ak zat hnih hnuai lam rawng lo lehnghal tan kan ram hruai­tute tlinlohna lam hawi sawi hi thil huphurhawm tak a ni a, amaherawhchu a turtu lam a chak em avang zawk hian kan hmuh leh hriat leh rin dan hi sawi lo thei lo dinhmunah kan ding ve ta si a, kan state neih hnua kan ram hruaituten ram an hruai dan hi tlem azawng chu i han sawi ve dawn ang hmiang.

State pakhat ni ve si tun thlenga RT-PCR khawl bun theihna laboratory kan neih chhan chu kan ram hruaitu lo ni tawhte vang a ni ka ti daih duh a ni.

Laboratory dinna tur chuan institution lian ve tak neih a ngai a, chutiang institution lian chu kan state hian a nei ve lova, ZMC hi Congress lamin an term tawp dawna ruaiah na taka an beih hnuah an din thei hram hram a, hetiang leka state kan la awm hi chu thil zahthlak a ni.

Inkalpawhna kawngpui kan neih chhiatzia hi kan ram hruaitute kan dem loh theih lohna chu a ni bawk. Lailapur ah khuan Vai sumdawng Raju a awm a, chu pa leh a kid ten min dan chhung chu kan buai a, a dan loh hun hunah ramri buaina fel ta ang maiin kan awm a, a chhan chu kawngpui ṭha dang kan neih loh vang a ni.

MNF leh Cong­ress-in hei leh chen min kaihhruai hnua kawngpui ṭha pakhat pawh kan nei lo hi chu a zahthlak a, kan ram hruaitute hian thil ṭha an tih tam hle mahse hemi kawng­ah hi chuan an demawm viau a ni.

Thil pakhat leh kan ram hruaitute an demawm ka tih ve ṭhin chu political party worker te contractor an nih tir zel mai hi a ni. Kan ṭhenawmah pawh hian sorkarna a inthlak rual hian motor thar nei ṭhin hi an inthlak zak zak mai a, chu mite chu hnathawh mumal pawh nei vak lo 'party worker' an tih ang chu kha an ni ve mai si a ni.

He system co­rrupt tak maia kan luh chhan chu kan politics kalpui dan dik lo a nih vang hian kan ram hruaitute min hruai luhna a ni.

Lalhruaitluanga