Building satute leh motor parking hi

Tunhma kha chuan kawngpui kama awmte pawhin lirthei heti takin a tam ang tih an ring bik lo ang a, an building sakah parking an siam lem lo tlangpui. Chung hunlai chuan kawngpui kam kha lirthei dahna (garrage) a ni mai a, sawisel hleih theih pawh a ni lo. Khang hunlai kha chuan a awm lohna pawh a la awm lem lo bawk.

Tun hnuah dan tharte a chhuak zel a, Aizawl khawpui enkawltu tur Aizawl Municipal Cor­poration (AMC)-te a lo piang chho ta zel a, insak dan te, chu a insakah chuan parking/ garrage a siam em tihte dan hmanga enkawl an ni ta. AMC-in dan a duan hnu lamah Aizawl khawpui kawngpui dung building san an awm ta nual a, lirthei dahna siam lem lo an awm nuk mai. Heng hote hi AMC-in engtin nge a tih? Dan hmangin action lak ngaiah chuan la hmiah hmiah se mipuiin kan thlawp khawp ang.

Kawngpui kama building satute hian mihring luah tur nge dawr atana sak tih te, dawr atan a nih chuan chu dawra thil leitute lirthei park-na a remchang em? Garrage nei thlip thlep lo pawh nise kawngpui kamah motor han park zawkna tur hmun a awm em? Lo awm lo ta se anmahni dawr turte lirthei park-na tur a siam em? Heng hi a pawimawh khawp mai.

Tunhnaiah Ram­hlun Vengah LRM hospital din a ni a, a awmna laiah kawngpui zau lai, lirthei park-na tur engemawzat a awm. Mahse he hospital hian lirthei tlan vel tihbuai chang a nei viau tawh a ni. Hospital hi chu kawng kam dawra thil leia din ang zawk a ni lo a, a tam zawk chu damlo tlawha kal an ni ber a, kawngpui sir parking awmchhun a khah tawh pawhin lirthei kenga kal tam zawk hian kawngpui zahna kan tlachham viau avang hian he LRM hospital pawh hian sawisel a hlawh ta zauh zauh.

A thu hrimah tun­hnai lawka building sak, chu building chu a purpose a zira parking nei tura ngaih a ni a, mahse chutiang ngaihtuah lem loa sak ve tawp an awm nual mai. Kan va kalna turah parking a awm ṭha em tih hi mipui lam pawhin kan ngaihtuah a ṭul ta hle mai. Lirthei kan neih vanga kenchhuah ve tawp a, lirthei dang veivak tana harsatna siam hi kan zak lo ta fo. He lamah hian a mipui lam pawh kan ṭhanharh a hun ta viau mai.

LRM hospital hi ka sawisel ngawr ngawr a ni lo. Mahse tun hnaia sak, kawngpui kama awm a ni a, mihring lut chhuak tamna tur hospital a ni miau a, chuvang zawk chuan tehkhinna ang deuha kan rawn hmang zawk a ni.

He damdawiina damlo tlawhtute pawh hi ṭhanharh a ngai tihna a ber e.

Lalkhirhvela