Mut rei hi a pawi
Tunlai kan ṭhalaite hi, zing tho har, mu rei an ni deuh vek. Tho tlai rilru chu a harh ṭha thei lova, nu leh pate thupek an zawm ṭha peih lova, chhungte ruala chaw an kil hman ve loh fo avangin chhungte rorel an hre hman lo fova, mahni a tal hran duhna an lo nei thuai ṭhin.
Zing takah thawh tum lova, zan tlai takah a mutna lam pan ṭhin chuan zing boruak ṭha dawng hman lovin tlai takah a thova, Lalpa'n chu mi ni a tih tur a pek pawh chu a ti zo hman ṭhin lo. Nitin a thawh zawh tur a tih zawh hman loh avangin kum tawpah chuan Lalpa'n a thawh phu tawk a Lawmman a pek tur pawh chu a lo tlem to sawt a, chu chuan pachhiatna a thlen ṭhin.
Tunlaiin kan ṭhalaite a tam zawk hi chu zing ni chhuak hmu hman ngai lova tho tlaite an ni a, chu chuan chhungkuaah pachhiatna a la thlen ang a, kan ram a ṭhan theihlohna pakhat a la tling ngei ang. Keini kum lama upa tawhte kan ral hunah, anmahni kovah tih tur engkim a awm hunah, thawh tlai ṭhat lohzia an hre chhuak tlai khawhnu ang a, chutih hunah chuan insiam ṭhat a har tawh si ang.
Hna ṭulna avanga meng rei te tan chuan zan hun hi a hlu a, zing lamah tho tlai deuh mah se an thiamawm. Mahse kan ṭhalai tam takte chu thil holam mai mai, nun hlimna zawnga zan meng rei, zing lamah tho tlai em em an ni.
Chung ho chu kan Zoram chhungkaw zahve aia tamah hian hmuh tur an awm. Tho tlai ṭhin chu chenpui an nuam lo. An thawh hmain an chenpuite’n hna ṭangkai tam tak an lo thawhsan tawh a, amah ngei pawh chu a hma a thawh tur tam tak awmte an lo tih sak tawh ṭhin a, an chenpuite chuan sawisel tur an ngah ngawt ang le.
Zing takah savate'n Siamtu an fak ri te, khawvar ropui tak lawmna ar khuang ri chuah chuah pawh lo, thawh tlai ngaia neih tam tak an awm. Zing taka tho ṭhin chuan tih tur a zawng a, thawh tur remchang a hmuhte a thawk zung zung a, a intodelh ṭhin. Tho tlai ṭhin rilru chu a chak thei lova, a taksa pawhin zing boruak thianghlim a hip ngai loh avangin a hrisel tur angin a hrisel ṭha thei lo.
Zing boruak ṭha Lalpa'n kan hip tura min pek te hi a thlawnin thamral tir lo ila, nang leh kei hian zing takah kan thawh avanga boruak thianghlim kan dawn te, hna ṭangkai tak kan thawh ṭhinte chu kan bula mite hriattir zel ila. Kan naute, zing tho ngai lote kai thovin, tih turte kawh hmuh ila, chu chu chhung tinte hmasawnna tur leh intodelhna tur a ni ang a, kan khawtlang nun timawitu tur a lo ni ang.
H. Neihchungnunga, Durtlang North