7th Pay maw?

Mizoram sorkar hnathawkte'n kum sawm dana an hlawh (Pay) ennawn (revise) ṭhin en nawn sak ve leh tawh tura an beisei chu 7th Pay hi a ni a. Chumi tihlawhtling tura Mizoram sorkar an nawrna pawh hmanni lawkah khan kan lo hre tawh a. Sorkar an nawr te kha chu an tih tur an ti-ah a ngaih theih a; amaherawhchu khati bup bupa sorkar nawr kha chu a nalh lo deuh mah mah chu a ni.

Hemi chung­changah hian pawl ṭhenkhat leh Party ṭhenkhat chuan Mizoram sum din­hmun ṭhat tawk loh avangin Mizoram sorkar hnathawkte'n hlawh thar (7th Pay) an lak ve hi rem an tih loh thu te an rawn au chhuahpui ve tawh bawk a. An thlirna zawnah kha chuan a awm ve tho mai. Mahse engahnge maw kan sorkar hnathawkte'n an hlawh tur an lak ve chu kan ui pui ve viau lem ang le?

Mizoram sorkar hnathawkte hian sorkar laipui hlawh (central pay) hi kum 20 kal ta daih tawhah khan an lo thlang (opt) tawh a. Mizoram sorkar State Pay Committee recommend-na anga hlawh la an ni lo.

Central sorkar hnathawkte chuan nikum 2017 khan 7th Pay hi an lo la daih tawh bawk a. Chuvangin Mizoram sorkar hnathawkte pawh hian hlawh thar an lak ve hi an chanvo (right) dik tak a ni zawk. Kan lo ui sak ve ngawt tur a ni lo vang. Mizoram sorkar (State) Pay Committee re­commend-na anga hlawh la lah an ni hek loh! Hmanni lawkah Prime Minister Modi-a pawhin Tripura sorkar chu 7th Pay an la hman ve loh avanga a dem thu pawh kan hriat kha.

Central sorkara an anpuite (counterpart) aiin Mizoram sorkar hnathawkte hian hlawh an la tam zawk te pawh kan ti a ni mai thei e, chu chu thuneitute ngaihtuah chi tak a ni ang. Tun hma deuh khan Pay Anomaly Committee te kha kan sorkarin a din tlut tlut a, lungawi lo apiangte hlawh kha a tihsan (up) sak zel mai a. Khang avangte khan thil inrualkhai lo chu a awm pawh a ni thei ang.

J. Sawilaia