Isua Krista hminga dil...

Kan Lalpa Isuan, "Ka hmingin eng pawh mi dil chuan, chu chu ka ti zel ang (ean ti aithshte me en tw onomati mou tonto poihsw)," tiin Chanchin Ṭha Johana ziak bung 14:14-a a sawi kan hmu a. Hetiang deuh, A hminga dil a sawina hi Johana ziak tho 14:13 (... hmingin.... dil....) leh 15:16 (Isua hminga Pa hnena dil)-ah te kan hmù bawk. Hmun dang hmun dang en lovin, ka'n rawn sawi chhan ber, 'hminga/ hmingin.... dil....' chungchang luh khung hi tun atan chuan a ni ber rih.

'Thawhlàwm hlàn' ṭawngṭainaah hian mi tam berin.... Isua Krista hmingin kan rawn hlan e... kan hlan e, tiin kan dilna kan titawp ṭhin a. Hetianga ‘díl/ dilna’ ni lo, 'hlàn/ hlanna'a ṭawngṭai tihtawp hi, thawhlawm hlanna a ni emaw thil dang hlanna a ni emaw a dang chuang lo va, a Bible ṭawngkauchheh lo deuh niin a lang.

A chunga Bible chang kan tar lan te khi kan en chuan, kan Lalpa Isua Krista pawhin, a hnena dilna tihtawp dan tur min zirtir dan chu a ni chiah lo deuhin a lang bawk. Pathian hnena thil hlan ṭawngṭaina tihtawp nana ‘hlàn’ hman hi a dik lo hulhual chu a ni lo vang a, a hman ve theih a, duhthu erawh chu a sam lo deuh tihna a ni ang chu.

Chuvangin, hetiang thlapa ṭawngṭaina kan titawp lo a nih pawhin Pathian chuan thawhlawm hlan ṭawngṭaina pawh a chhang ṭhin tho tih kan hria a. Chutiang chu ni mah se, Kristian kan nihna pawh kum 120 zet a nih tawh avangin tih dan hlui, duhthusam lo zawk vawn reng ai chuan tih dan ṭha leh mawi zawk hmang tura thlarau lama kan inbuatsaih ve sauh sauh chu a ṭha ang.

Dr J. T. Vanlalngheta