Media-ah khan kan chak ta em?
Ramri buainain a ken tel pakhat chu media lama kan indo thu kha a ni. Khatah khan Assam nge Mizoram kha chak ta? tih te mai zawhna hi inzawt ila chhan harsa kan tih ka ring.
Chak zawk an awm pawhin ka hre lo. Assam chuan media indonaah chak zawk an inti ngei ang. Mizoram pawhin chak zawk angah kan in ngai ve tho.
National TV in kan politician te an rawn kawma sawi tur an hre mumal lo leh an sawi hman mang te lo kha kan lo zak a, ṭawng thiam loh hrim hrim kha chu zahthlakah ka ngai lo.
Ṭawng chu thiam loh theih a tehmeuh mai, khang kan ram hruaitute khan ram kaihhruai an thiam loh chuan chu chu a zahthlak zawk daih. Ṭawng thiam lo ram kaihruai thiam an nih chuan ka la pawm thei.
Ṭawng thiam zal mai ram kaihhruai thiam leh miah si lo kha ka ngaisang lo zawk. Media zawhna pawh chhang thiam lo, ram kaihhruai thiam bawk si lo hruaitu phei chu tunlaiah chuan an ṭha tawh lo.
Assam Chief Minister kha kan ṭhalaiten an han beih rawn tak tak mai kha chu Twitter ah pawh khan ram dang mite an inrawlh a rin thute a au chhuah pui ruai mai. #Shameon Himanta tihte #HimantaIs TheProblem tihte an han au pui kha chu Himanta kha kan ngei pawh ni lovin kan hua a ni.
A hnu ni hnih velah kan Minister pakhat chuan 'Himantaji' tiin tun hmaa an boruak ṭhat lai kha Twitter-ah bawk a rawn post leh hlauh mai a, a hmaa Himanta beitu kan ṭhalaite khan Minister pawh zuah lovin an bei zui ve leh a ni.
Media-ah chak duhin kan English leh Hindi thiam ho an han che tak tak a, Mizo bawkin kan lo chhiar leh sup sup a, kan chak ta hliah hliah khan kan ngai. Kan thawm kha a ṭha zawk a ni.
Mahse, a pawimawh ber chu kan ramri a zauh phah em? tih hi a ni. Kan inkah chhan kha kan Police duty post min luh chilha min um chhuah vang a ni. Duty Post kan nei kir leh ta a, mahsela ram feet khat pawh kan neih belh chuang si lo.
Media-ah chak pawh lo ni tehreng ila ramri buaiah chuan ram chu kan neih belh lo a nih si hi.
Lalremruata