Hunthar Veng lei tlahniam ven dan ṭha

Khua a lo ṭhal leh ṭan tain ruahtui tla a lo tawp ta a, khawlaia mipui lam titiah Hun­thar Veng lei tlahniam ri pawh a reh titih ta. Nimahsela, a tuartu tan chuan rilru hahna a la reh lovin a pawi dan pawh a la pangngai reng mai. 

Chuvangin, helai harsatna hi a tuartuten an tawrh zui tawh loh nan leh harsatna dang a thlen tawh lohna turin eng ang ruahmanna nge kalpui lai awm tih pawh ka hre hauh lo va, nimahsela, a tuartuten an tawrh tawh loh nan leh helaia lei che leh tlahniam hi a awm tawh lohna tur rawtna pakhat han pho chhuah ka duh a. Ka rawtna hi engineer-ten ruahmanna an siam chuan tih puitlin ngei theih chi a nih avangin thuneituten an bawh zui theih hlauh takin ka han tarlang a ni. 

Sewerage Manage­ment project-ah hian a hmangtu chhungkua zawng zawng aṭanga ekin leh zunin aṭangin ek leh zun thli zawng zawng, choka thli zawng zawng leh bual in thli zawng zawng lakkhawm a ni ṭhinin chutianga thli lakkhawm chu ti thianghlimin a tak awm zawng chu leiṭhaa hman ṭangkai theihin tih thianghlima lak kian ṭhin a ni. Tui pawh luikawr leh luiah tenawm tawh lova sawngbawlin thianghlim taka luan luh tir theih a lo ni tawh ṭhin a ni.

Fur hun a lo nih apianga ruahtui lo tla zawng zawng hi mimal tuizema dah khawl leh tuihawka kal hi a ni ṭhin a. Tuihawk luankawr (storm drain) ṭha hi nei ila chuan kan in leh a vela ruahtui lo tla zawng zawng hi lei chhungrila lut hauh lovin tuihawk luankawrah luangin kan duhna hmunah kan thehthang thei dawn a ni. Chutiang chu a lo nih chuan kan in leh a vel hnuaia lei hi a tihnawng leh tihuhtu tui awm miah lovin hul ṭha takin a awm thei dawn a ni. 

Chutianga chenna in leh a vel hnuaia tui awm lova a hul phawt chuan Hunthar Veng lei tlahniam ang hi chu fur nasa tak pawh ni se, kan pumpelh theih mai hi a beiseiawmin ka hria. 

Chutiang ang chuan Chanmari veng tlak lam aṭanga Hunthar Veng inkara cheng zawng zawng leh Vaivakawna in ṭhenkhat huamin an thli luang ṭhin zawng zawng la khawm ila, Micro-Sewerage Management Project siamin an zun leh ek in thli te, choka thli te leh bualin thli te la khawmin company lui thlang velah khuah a tih thianghlimna (Treatment Plant) siam ni ta se. 

Tin, tuihawk luan­kawr hi ruahmanna (plan) fel tak leh uluk taka siamin ruahtui hi fur pui ber lai pawha lei chhung rila lut lo thei ang ber tura buatsaih ni ta sela chuan helai area-a tuiin lei a chiah zawp ṭhin hi a lo hul tawh ang a, tuna kan buaina nasa tak hi chu a kiang thei ngei ngei ang tih hi a rinawm tlat a ni.