Kan chap a char ve lo

Kan hriat ṭheuh angin Mizo kut pawimawh ber zinga Chapchar Kut a lo thleng mek a. Kan ram khawpui berah chuan ropui taka lawm mek a ni. Nula tlangval, tar leh naupang thlengin an hlim leh viau ang. Veng kilkhawr tlangval 

ṭhenkhat, Chapchar Kut chauha Lammual lut pha leh mipui pungkhawm boruak hrethiam lote pawh an lo in chapchar leh ngei ang. Hun pui a ni a, hetiang tawk hi a awm ve tur a ni! 

Kut hman nan sawrkarin sum tam tak a seng ral leh ngei dawn, mi hausaho ei tur aṭanga carpet pin man thlengin sum senralna hlir a ni leh dawn. Heng sum zozai hi khawia mi nge? Khawpui mite tan liau liau budget-ah dah a ni em? Nge Zoram mipui sum bawm aṭangin an sawk thla leh hlawih dawn le? Hlawkna awm lova a tlaran zawnga kan kal zel zawngin kût hi zahpui hun kan neih a hlauhawm. He ti zozai sum kan hmanral ṭhin te hian hlawk zawkin hna a thawh theih ngei ang. Kan seng ral ta sa sa, zo nun mawi in zirtir nan te nasa zawka hman ni sela, lam hulh hulh chauh lo deuh hian hlawk tlan pui theih dan a awm ang. 

Chap pawh la hmu lo, engnge a nih pawh hre loten nuam an tawl tur leh a tam zawkin an kût hman awmze hre lek lova hun an han hmang leh mai mai tur ka mitthla te hian kan kût hian engnge hlawkna a neih tih ka ngaihtuah ṭhin. Thilsiam thar te lah zah chu sawi loh, a tuai lo leh a patil lote hi min hmu hniam zawk emaw tih turin an rawn kal leh awh awh ang a. Chapchar kût hi mipa leh hmeichhe dik tak tan chauha hman chi ni awm tak a ni, kan pi leh pute hun lai aṭang tawh khan kût hmannaah heng mite hi sawm ve chu sawi loh, tihpalh thil thu pawhin an kal ve ngai kan hre lo. Anthurium festival velah kal ang hmiang. 

Rim taka lo vattute hian vahchap awllen lai hi asin kan thlakhlelh ve ni. Sum tam tak senga khawpui miten nawmsip leh hlimhlawp an bawl laiin keini ramvak min khap leh si. Rim taka ram chang kan ṭhiah hnuah lo hal hma hun tlemte hahchawlhna hun kan nei a, mass laia kan sa ei chhun zawm leh mai na tur awm bawk si lo nen, chawhmeh zawnga ram vah lo tih tur nei ve tawh heklo, kut ropui min buatsaih sak ve ni ula tunge chawlo dang char a, man hlau reng reng a rampa lailenga vak ruk ruk peih bik ang. Necktie hnuka bek lei hrut lek leka chheih lam ve te chu kan chak asin, mahse Chapchar Kut hi kan ban phakah min chhawp chhuah sak ve duh si lo. Sawrkar hmalaknaah chuan khapna thupek hian thingtlang khua a thleng zingin sawrkar aṭanga kan hnianghnar ve ber a ni hial awm e. 

Thla tin mai ruahtui a la tla a, kar liam ta maia ruah sur khan kan vahchap te a chiah zawr hneh ngei mai. Khang char leh tur chuan nghah leh deuh a ngai, lo hal hun lah chu hmunpui lam aṭanga rel sak kan ni rup zel mai bawk si. Khua lah chu a tlaran zawnga sawrkar sum luangral sun ni awm hrimin a ngui nghuih reng a, vahchap a char mawh ngei mai. Nangni chuan roreltuten ram tana ṭha tur nia an ngaih ang chuan hlim takin he kût ropui hi hmang ula, a ṭha zawnga hlawkna tur zir chhuak ngei turin duhsakna ka hlan a che u. Keini zawng kan chap a char ve lo e.