RAM ROHLU REMSIAMI!

Olympic a zo a, India ram aṭanga medal late chu sawrkar leh pawlin nasa takin a chawimawi a, sum leh pai tam takin a vur; an lawmpuiawm khawp mai, an phu bawk. Mizoram sawrkar pawhin infiam mi mi bikte a duhsak ṭhinin, Olympian Remsiami tan theihtawp a chhuah a, sum leh pai bakah, sawrkar hna leh hmun lo ram thlengin a pe a - a lawmpuiawm!

India then thlengtu Thenzawl
Mizorama hmeichhe hoc­key thiamte chherna 'pum' pawimawh ber chu Thenzawl a Sports Au­tho­rity of India leh Mizo­ram sawrkar Sports Department te inenkawl tawm, Girls Hoc­key Academy hi a ni. Thenzawl a hockey zirna tan a nih hma hian Durtlang field bulah hockey academy hi din tum a ni a, Durtlang VC te pawh­in ram te pawh an pe a, amah­erawhchu sum lam harsatna avang leh remchan lohna dang avangin ṭhulh a ni.

Kum 2004 April thla khan Thenzawl ah bul ṭan a ni ta zawk a. Bul ṭan a nih tirh chuan sawrkar aṭangin sum leh pai duh ang hman tur a awm mai si lo a, harsatna tam tak an paltlang. Harsatna tam tak an neihte chuan an tumruhna a bawhbet zo lo a, an hmun hma neih leh an hmanraw neih ang apiang te chu ṭangkai takin an hmang a. Mizoram hockey team ṭha zawk, player ṭha zawk chher zel tumin hmalam panin an kal ṭauh ṭauh a. Beidawn rum rum chang nei mahse an hmaa eng awm chu umin, tun hun hi an thleng ta. Thenzawl hian India team a tel phak khawpin Mizo nula te a then thla ve nual tawh a.

India rama hockey aca­demy ṭha ber ni phak lo mahse thawkrim ber pawlah an chhiar theih mahna!

Miss Pari & Co
Mizoramin hmeichhe coach kan neih hmasak Lalrampari leh Vanlalveni ten taima takin training an neih pui ṭhin. An academy chhehvelah chuktuah huan te siamin, an thlai thar te chu anmahni ei khawp bakah hralh chhuah tur an nei thei bawk a. Heng an thlai hralh chhuah aṭang leh mi ṭhahnemngaite puihna nen, mawlmang leh harsa takin bul an ṭan a ni. An bul ṭan dan tlawmin harsa viau mahse, a enkawltute leh player te tum a ruhin ṭhahnem an ngai a, hreawmna leh harsatna in a tuk dawl zo meuh lo.

Academy neih hnua Mizo­ram aiawha an fehchhuahna hmasak ber, Junior Nehru Hockey Tournament (Sub. Junior Girls) 2004 ah khan Mizoram team hmasawnzia mite hrilh fak a tling. Training ṭha leh mumal taka enkawl hlawkzia pawh an hmu. India ram pumah pariatna an ni pha. Heng an result te hian a tiphur a, Thenzawlah uar leh uluk zawkin an inzir leh a. Kum 2005 ah 12th Junior Nehru Hockey Tournament ah chuan Runners up an ni ta hial mai. Mizo nula paruk lai mai U-18 Asia Cup India team coaching Camp a awm turin an thlang ta bawk a ni.

4 Nations (Korea, India, Japan, Malaysia) Junior U-18 Women's Hockey Kaka­mi­gahara International Challenge Cup, Gifu Japan-a khelhah Mizo nula pahnihin India aiawhin an khel a, hemi ṭum hian India coach chu Lalrampari niin, India hi an champion nghe nghe. Hemi hnu hian Thenzawl Hockey academy hian India ram pum huap inelnaah result ṭha tam tak an lo hnutchhiah tawh a ni.

International Player hringtu
Thenzawl Hockey Acade­my hi SAI leh Mizoram Sor­kar chuan Memorandum of Understanding (MOU) 16.8.2007-ah ziakin SAI hnenah a hlan a. SAI hian hmanrua leh player ei leh in te tumin ṭanpui ve bawk mahse Mizoram sawrkar pawhin tihtur leh mawhphurhna a nei ve bawk. He academy hmun­hma enkawlna leh tuai hnum kawngah tha a thawh tam tawk lo niin sawi a ni. Ṭan lak tharna atan a itawm hle. Mizo hmeichhia 10 zetin India aiawhin hockey an lo khel tawh a, hengte hi Thenzawl Hockey Academy aṭanga in zir chhuak an ni hlawm a ni.

Hmalama eng awm chu...
Mizorama hmeichhe hockey tih hmasawnna kawng­ah Mizoram sawrkar hnuaia Sports Department te, Mizoram State Sports Council te Hockey Associa­tion te thawhhona, Sports Authority of India leh Thenzawl mipuite inpekna a fakawm. Hmeichhe lamah Inter­na­tio­nal player tam zawk an chher chhoh theih a beiseiawm hle a.

He academy a lo puitlin theihna tur atana sulsutu hmasa Sports Department a Director ṭhin Pu Zoliana Royte (L) hmathlir leh hma­lakna te kha a fakawm takzet. A enkawltu hmasa leh a hreawm zawng zawng lo tuar hmasatu Lalrampari, Coach leh Vanlalveni te kha an fakawm tak zet. Miss Pari hi India coach dinhmun hial pawh lo luah tawh, Mizo naupang ṭha zawk chher chhuah an nih theihna tur atana Mizorama let leh ngat a ni.

He academy hlawhtlinna atana mimal tha leh zung sengtu, sum leh pai thawhtu sawrkar, pawl leh mimal pawh an awm ngei ang. An hming sawi chhuah vek theih ni lo mahse he academy inenkawlna kawngah sawrkar pawhin ngaihtuahna thar sengin hmasawn zel turin ṭan la se.

Naupangte enkawltu coach-te leh thawktu dangte pawhin ṭan la sauh sauh se, he academy hi Mizoram leh India ram tan hmun pawimawh leh hlu tak a nih chhunzawm zel theih nan ṭan lak tlan a ṭul hle.

Remsiami Rem Siam
Chawimawina leh sum leh pai sawrkarin Remsiami hi an pekah hian sawrkar hi tawp mai lo se. Hun lokal leh zel tur atana Remsiami hming a daih mai loh nan ruahmanna dang siam a ṭul hle. A inzir chhuahna hmun Thenzawl Hockey Academy te hi Remsiami avang ringawt pawhin thuam ṭhat a, changtlung zawka enkawl a ṭul tak zet.

Remsiami avangin hockey ground thar emaw hockey academy dang te pawh hawn ni ta se, a awm lo hran lo e. Chumi kawngah chuan sawrkar pawhin tha thlah loin, lunghlu dang phawrh chhuak thei turin thuk zawka zen a ṭul.Thenzawl Hockey Academy hian International player sawm chuang a chher chhuak tawh a, hmeichhe hockey-ah Mizo nulaten talent an nei tih hei hian a lan chian tir.

Remsiami hniak hnung zui tur an awm ngei a rinawm. Zawn chhuah a, zirtir a, enkawlin tuai hriam ila, Remsiami tam zawk lo chhuak teh se. Thenzawl Hockey Academy a thawktute hi tun dnhmun thleng thei tura Remsiami lo siamtute an ni a, fakin awm rawh se!

Hmingsanga