AMC hi mumal deuh se

Aizawl Municipal Corporation (AMC) hi an pawimawh em em khawp mai a, mihring 290000 chuang zet enkawltu an nih avangin hna pawh an ngah ve thawkhat viau turah ngai ila.

Amaherawhchu buai vang ngawta Aizawl khawpui an enkawl fel hleithei lo erawh hi chu a ṭha lo - bawlhhlawh chungchang pawh.

Ka sawi duh chu, kawng sira eizawng (Street vendor) kan tih maiho hi Aizawl khawpui hmun hrang hrangah an awm ve ta a. Covid 19 hrileng vangin an mangang hle bawk a ni. India ram an zirchiannaah chuan Covid vanga eizawnna buai nasa ber zingah Street vendor-te hi an tel a ni. Chutih laiin AMC hian dan mumal tak a neih angin kawng kama eizawngtu street vendor te eizawnna hi tun ai hian humhalh se a duhawm hle.

Street vendor-te hi dinhmun khirh takah an awm mek a ni. A chhan chu Lockdown chhung khan Aizawl khaw­pui chhung kawng­pui remchang lai apiangah motor (a bikin motor lian) an ding khat deuh vek mai a. Kawng sirah Truck lian pui pui leh bus te an ding khat deuh reng a ni.

Hengho pawh hi hna an khaihlak avangin an ding a ni mai a, mahse an din lohna tur hmunah khawpui chhung kawng sirah an ding khat tlat reng mai hian kawng kama eizawngte a tibuai hle a ni.

Hetianga kawng­pui zau remchang lai apianga truck leh bus te an han ding khat tlat hi engtia tih chi nge ni ang? AMC ni loin Traffic ho thiam loh a ni zawk em? An dinna hmuna street vendor-te tan han hnawt kian mai ngam an ni si lo a, an kal sawn duh lo bawk a ni. Kawng kama eizawngtute an mangang hle.

AMC hian hna tam tak a nei a, an buai hle ang. Mahse Covid 19 in eizawnna a nghawng nat ber pawl street vendor-te manganna hi tun ai hian ngaihven lehzual thei se a lawmawm hle ang.

Street vendor-te hi mi hausa an ni lo a, mahni puala dawr mumal taka neia inzuar thei an nih loh vanga kawng kama inzuar mai mai an ni. Chutiang dinhmuna ding an nih avang chuan an inzawrhna hmuna mi hausa zawkten motor an han hung khat tlat zel mai hi thil ṭha lo tak a ni.

Dan anga kawng kama truck leh bus te hi hun phal a nih erawh chuan sawi tur a vang hle thung ang a, street vendor te tan chuan vanpui a chim a ni mai ang.

Mahse kawng kama truck lian leh bus te hi din phal a nih loh a, truck terminal leh an dinna hmun ruat bika ding tur an nih erawh chuan AMC hian chak takin hma la tawh hram se a lawmawm hle ang.

Ramhmangaiha