Politics nge Politricks?

Hun tam a la liam lova, kum 2018 kum tir lamah khan Mizo­ram Congress chuan term hnihna an hmang zo dawn tawh a, corruption lamah puh hmingchhiatna an tam lova, zu an zuar tih leh kawngpui an zuah chhe rei deuh tih lovah chuan nasa taka sawi chhiatna tur pawh an awm mang lova, MLA an ngah dan en kha chuan awlsam taka sorkar nawn leh tura ngaih an ni. 

Hetih lai vek hian kan la hria ang a, ZPM te chu inhlawm khawm tum, boruak nei ve tawh mahse tute nge an nih chiaha eng ang pawl nge an nih dawn tih hriat mang si loh, mipuiin Congress leh MNF an nin tawhna remchanga hmanga lo luh tumin an in hawr khawm ve mek a, hetih lai hian MNF chu sorkar tur anga sawi pawh a la awm mang lova, a zawna vawi hnih an tlak chian em avang leh an top boss zawng zawng MLA ni phak lova an tlak vek avangin mipuiin an beisei lo a ni. Politics chu Vanlalsailova hla, 'A lo mak thei ngei mai,' tih ang kha a lo ni tih a chiang ta a ni. 

MNF lamin Pu R Lalzirliana, Congress MLA chhuanvawr leh an Party Vice President pachal chu an thlung ta ruau mai. MNF zawm hrim hrim a duh vang lam aiin Congress President laka a lungawi loh vang nia sawi awm mah se, a hre chiangtute chuan MNF zawm thar zingah amah pawt tlattu, a tal chuah phal lohna a awm an tih chu mawle! Tichuan, Pu Lalrinliana Sailo pawh a kangkai ve zel a, an pahnih an chhuah kha chuan a nghing ve laih satliah a ni lova a nghing dur dur tawh a ni. 

Candidate nih phak loh vangin Pu Hming­daillova Khiangte a lo chhuak ve bawk a, engtik laiin nge ka chiang tawh lo Dr BD Chakma pawh BJP lamah a lo lut tawh bawk. 

Congress par tlana a tui hang hawptute kha Congress an nghing deuh tih an hmuh vangin an chhuak sup sup a, a hmaa an hmelma kumhlun lehan theihna apianga an sawi chhiat Party lamah an lut dial a ni. 

Inthlan a zawh meuh chuan a hmaa zero ZPM khan MLA seat pakua an han ne ṭhawt maia Politics a hmelhriat ngai loh MLA an lo dawk chhuak zawk zawk awk a ni. MNF chu sorkarna siamin an rawn tling a, an tlinna margin (vote) sang lo mah se an mamawh zat MLA an nei thei tlat. ZPM-in Congress an vaw chhiaa MNF an vaw chhe zo lova, party nghet sa MNF an tling leh ta. 

MNF-ah hian ri ret ret a awmna a rei tawh an ti a, chu chu a ri ring tial tial an ti a, Zozam Times chuan MNF party boruak a rawn ziak thut maia Hnam Run lama bo­ruak inmung awm an tih hi Politics leh Poli­tricks? tih mipuiin kan la hre ve thiam lo.