Dem lul suh, he hmeichhia hi! (International Women's Day pualin)

Thartea’n “Dem lul suh he hmeichhia hi, hmangaihtu a tawnga a luangliam a ni” tih hla a han sa hlarh hlarh mai hi chu a ngaihthlak ava han nuam suai suai tak. A satu hian a sa uluk nasa mai sia. Heti hian ka ngaihtuah chhunzawm ta a. Kha hmeichhia, Isua hriak rimtuia leihtu kha hmeichhia kher kha ni lo se a zirtirte khan an kamkhat ang em? tih hi. A ni lah taka kawng ṭhenkhatah chuan thil thuhmun rengah mipa aiin hmeichhia hi dem an lo hlawh zawk fo a lo ni.

Pathianthu hian hmeichhiate a demin kan hre tlat
Johana 8: 3-11-ah khan uirenu, a uire lai tak an man kha lunga denhlum turin Isua hnenah an rawn hruai a, Isuan a lo ngaidam a, a lo humhim. A uiretupa hi hremna a tawh ve pawh kan hre lo. Mipa emaw hmeichhia emaw a mal chauhvin a uire theih loh. Mahse tih sual inang rengah hmeichhia chuan hremna leh mualphona a tawk bik a, Mizo rilruah uirena chungchangah phei chuan mipa chu mualpho ve thei pawhin kan ngai mang lo.

Zawlnei Miriami pawh kha Mosia dinhmun luahlan tum a, thik niin kan sawi ṭhin a, chuvanga phar ta ni hialin kan ngai bawk. Mahse, heti zawng hian kan ngaihtuah ngai em? Arona nen khan an inthurual reng a, Arona chu tisual ve lo ang maiin hrem a ni ve miah lo. Miriami phar chhan chu Mosia a thik vangah kan puh a, kan hmu chhe khawp mai. Heng te avang hian hmeichhia chu rorelna thilah lo inrawlh ve lo turah kan ngai a, an theihna leh dinhmunte thlir hauh lovin mipa dinhmuna din chu mualphona leh zahna tur hiala ngaiin hmeichhiate kan dem fo a ni.

Hmeichhia hi sual lo pian chhan, a bulpui ber nia ngai a, hmeichhiate demna ṭawng­kam “Hmeichhiate chu Eden huan aṭang reng khan mipate thlemtu in ni” ti a, hmeichhiate sual bul ni hiala ngaia han khei zauh ṭawngkam te hmeichhiate hian an dawng fo ṭhin. Thlemtu nia ngaihna hian hmeichhiate chu sual zawk leh buaipuiawm zawkah a chantir fo a, hmeichhiate hmuh hniam nan leh thlemna pawh hmeichhia te aṭanga

inṭan niin kan sawi fo ṭhin a. Chik zawka kan chhiar chuan Gen 3:6-ah “a rah ṭhenkhat chu a lo va, a ei ta a; tin, a pasal a pe ve a, a ni pawhin a ei ve ta a” tih kan hmu.

Evi khan Adama kha a thlem chiam pawhin a lang lo, a pe a a ei ve a nih mai hmel. Lo thlem ta tehreng pawh nise hmeichhe thlema awm mipa chu tunlai ang chu nise nep kan ti ngawt ta ve ang!

Sakhuanna hian kan rilrua kaihruai thui se
Mizo te hi kan sakhuanna leh kan Pathian thuawih dan hian kan hnam nunphung leh rilru puthmang a khawih thui hle. Kristianna kan seng luh hnu aṭang phei hi chuan engkim hi Pathianthu, Bible zirtirna aṭangin kan teh emaw tih mai tur a ni a. Kan hnam nun, a bikin hmeichhiate dinhmun pawh hi Bible zirtirna kan hrilhfiah dan leh kan Pathian thu pawm dan hian a hril thui hle. Hmeichhe dinhmun leh awm dan tur sawifiah nan hian Bible kan tlawhchhan fo a. Hmeichhiate dinhmun hi engtin chiah nge Bible hian a lo sawi a, kan hrilhfiah dan hi a dik meuh em tih hi rilru thara kan ngaihtuah ava ṭul ta em!

Mizote rilruah chuan sawn pai nula chu sawnthlaktu tlangval aiin a mualpho zawk, nuthawi chu pathlawi aiin a zahawm lo, hmeithai nih pawh zahawm lo-ah kan ngai tlat, zu in ṭheuh ṭheuh pawh hmeichhe zu in chu kan hmusit zual bik. Khawhar inah hmeichhiain thu a sawi ve chuan hmeichhe huai sar, nupui atan pawha neih duhawm lo angah kan chhuah a. Heng hmeichhiate hi eng vang nge an mualpho a, an zahawm loh bik? Hmanlai aṭangin kan rilruin nia kan hriat tlat, kan rilrua lo bet tlat a awm vang ni berin a lang.

Beng tharin ngaihtuah ang
Mizo hmeichhiate laka kan rilru puthmang, an tihtur nia kan ngaih te, sakhaw serh leh sanga an telna tur chin nia kan hriat te thlengin thuthlukna kan siam ṭhin a, chu chu Pathian thu-in min nemngheh sakah kan ngai a. Pathian thu te hi ngun taka kan chik a, eng hun laia ziak nge? Tu te tana ziak nge? Eng nge a kawh tum? tih te ngun taka ngaihtuah chunga Pathian thu hi zir a, hrilhfiah hi a ngai tawh tak zet a ni. Mizo hnam phei chu kan sakhuana hian kan khawtlang nun a thununna chen a awm tlat avangin tute emaw nekchepna emaw sawi chhiatna atan emaw Bible hrilhfiah fo te hi a him lo a, a Pathian thu lo em em a ni.

Pathianah chuan mipa leh hmeichhia pumkhat leh rawngbawl tlang tur kan ni. Chuvangin, Mizo tih dan alawm! Kan hnam kalphung alawm tih changchawia hmeichhia te hnuaihnung leh thil ti thei lo, chak lo zawk nia kan ngaih fona te, hmeichhiate ngei pawhin ‘chak lo zawk kan ni’ kan tih tlat ṭhin hi bansan a hun. Nu ber chhuak tam lutuk fate an sual duh bika kan ngaih te hi a dik tawk lo, chik mah teh, chhuak ngai miah lo fate hi an ṭha bik chuang miah lo! Pathian thu hi hmeichhiate mit/ thlirna aṭangin i chhiar nawn leh ang u.

Mari, hmeichhe rila rah ngei aṭangin Krista, khawvel chhandamtu a lo piang a, khawvel chhandamtu lo inṭanna chu hmeichhia-ah a ni. Kan dem duh a nih chuan a mimal zawngin in dem ila, i generalized lo hram ang u. Dem lul suh he hmeichhia hi!

Rualzamawii