CHAWIMAWI PHU DRIVER

Ni 25.2.2018 tlai lama Champhai Zote a driver pakhat, Pu Lalhminga, a motor kawng sira a dah, a chhuk hnu a lo che thei, nam din a tumna lama a nam din theih loh avanga amah zawk a chil tak avanga motor pawh a ding ta tih leh, a mah zawk chu a chil nat avanga a boral tak thu kha ka lo hre ve a.

An sawi zel dan phei chuan amah kha motor khan chil ta mai lo phei sela chu a lir zel ang a, chawhnu inkhawm ban lai tak a nih bakah, khawlai dung a ni si a, thil a tichhe hnem hle dawn niin a lang lehnghal a. Vanduai a chungah nuuna tam tak leh bungraw tam tak chu kha driver boralna leh a inhlanna khan chhan-him niin a lang thei a, a ropui ngawt mai.

Tunlai kan khawvel nunphungah chuan kha vanduaina kha thil atthlak tak ni pawhin tam tak chuan kan ngai ngei chuan a rinawm a. Amah ringawt inngaihtuahin, midang nunna leh kha motorin in leh bungrua a tihchhiat tur lam ngaihtuah lo leh thlir lo chu ni sela khatiang vanduaina kha a tawk hauh chuan a rinawm loh. Mi ngaihsam leh thil dawn thui lo chu ni sela, ‘ni mai mai rawh se,’ tiin a insaseng daih thei chuan a rinawm. Tunlai kan khawvel ngaihdanah chuan mi a tiin kan sawi thei hial awm e.

Kha tak kha a ropui-na chu a ni tlat si a ni. Kan Mizo rilru diktak aṭanga ngaihtuah chuan kha driver kha a Mizovin a tlawmngaihna kha a ropui takmeuh a ni.

Kan pi leh pu aṭang tawhin kan hnam nun phung chu midangte tana nun, “sem sem dam dam ei bil thi thi” tih a ni ṭhin a. Tunlai kan khawvelah hi chuan khatiang nun kha a awm tawh ngai meuh lovin a tham ral tan ta chu a ni ber e. Mahni chauhvin nei ila, kan ṭhenawm khawvengte chuan nei lo mah se keiin ka neih phawt chuan pawi lo tihna kan nei lian tawh em em a ni.

Hetiang hi kan ram boruak a nih mek laia kha driver chhuan­awm tak, Mr. Lal­hminga (L) kha chuan midangte tan a nun a hlan thak ngam a, midangten an tuar ai chuan ama eizawnna ngei chu thih pui a thlang ta kha a ni a. A ropuiin chawimawi a phu hle mai.

Kan sorkar pawhin huaisen Lawmman ram pum huapa an sem thin dawng tur hian recommend ve ngei se ava ṭh em.

Khatiang taka mahni hnaa rinawm leh inpe zo, midangte tawrh aia mahni nun pawh hlan huam leh hlan thak mi kha kan khawvelah hian an tam vak pawhin a rinawm loh.

Chuvangin, mi­huaisen leh mi tlawm­ngai, midangte tana nun hlantu dik tak niin a lang a, chuvangin huaisen lawmman emaw tlawmngai nopui emaw dawm ngei atan chhawp chhuah chi tak a ni lo maw le?

Patrick Z. Chhingchhip