Falkawn Referral damdawiin tihchangtlun
Mizoram Sawrkarin Falkawn Referral Hospital hi tipuitling turin nasa takin hma a la chho zel a, a lawmawm hle mai. Sawrkar inthlak avangin a nih tur ang a ni thei lawk lo hi chu thil vanduaithlak tak a ni.
Engpawh nise tun hma lam thil chu sawi nawn fo tawh lo ila, tunah hian hmasawn zel tura hmalakna hi tluang taka a kal theih nan mahni tawka mawhphurhna nei apiangin kan tih theih ang ang a tha thei ang ber turin hma i la ṭheuh ang u.
He Damdawi In chungchangah hian hmalakna tur ka ngaihpawimawh ve tak han sawi ka duh a ni. Ni 29 Januarv, 2018 khan kan tupa damlo tlawhin kan va kal ve a, chuta ka ngaihpawimawh tak leh tih hlawhtlin ṭul ka tih chu ka hmu a ni. A chhawng chung ber Medical Ward-ah kan kal a, damlo khum 30 vel a awm niin ka hria. Heta damlo awm zawng zawng leh a awmpuitute'n ek in kaw hnih chauh an lo inhmanṭawm a lo ni a. Damlo leh a awmpuitute tan a buaithlak hle tih ka va hmu ve a, ka khawngaih hlawm ngei mai.
He Damdawi In sak dawna a plan and estimate an siam dawna DPR-ah hian ek/ zun in kaw 2 lek awm tur hian em ni an ruahman ang aw! Hetianga mi tam tak awmna hmuna ek in pahnih chauh siam a ni hi a tlem lulai deuh chu a ni. Tunah hian hmun remchangah sawrkar hian siam belh thuai sela a lawmawm hle ang. Ward dangah ka kal lova hmun dangah pawh hetianga ek/ zun in indaih lo taka an awm a nih chuan siam belh vek nise, Damlo leh a awmpuitute tan a lawmawm hle ang.
Tuna inthiarna commode awm hi European type a ni a, hetiang la hmang ngai lo leh hmang thiam lo an awm nual bawk a, a chungah an ṭhu tunga a buaithlak hle mai. A chhinte pawh a tla tawh a, hman dawnin siam ṭhat zel a ngai tawh a ni. Commode ṭhut chilh chi pahnih emaw chu awm belh a sela a lawmawm khawp ang.
He Referral Hospital tihchangtlun nan hian doctor pawh hmun dang aṭanga sawn luh an ni a. Kulikawn Damdawi In aṭang pawhin doctor thawk lai ṭangkai tak tak 4 lai sawn chhuah an ni a, mi dang 2 dah luh leh an ni te hi Kulikawn Veng leh he Damdawi In hmang
ṭangkaitute chuan ṭha lo kan ti hle mai. Heng an sawn chhuah takte hi sawn loin Falkawn atan an mamawh ang chu la thar mai sela tih hi kan duh dan a ni. Bang thlang pawp thawm nan bang chhak lam sah thlak ang deuh a ni.
Kulikawn damdawi in aṭanga doctor sawn chhuah tumte hi sawrkar hian min dah ngheh sak leh sela, Kulikawn mipui, he Damdawi In pan ṭhinte hian kan duh tak meuh meuh a ni.
Falkawna Referral Hospital tih changtlun ka duh a, ṭha ka tih laiin Kulikawn Hospital-ah pawh doctor ṭha kan mamawh reng bawk si a, sawrkar hian ngaihtuahna fim hmangin rem min ruat sak kan va duh em!
F. Lalenga, Kulikawn