Lirthei khalh dan fimkhur a ngai
Aizawl khawpui kawng chep tak karah lirthei tam tak nitin a tlan a, lirthei a pung chak em em mai si a, two wheelers tan lah traffic jam a awm reng ta mai. Hetiang karah hian lirthei khalhtute'n lirthei dang khalhtute ngaihchan thiam a ṭul ta hle mai.
Tow wheelers khalhtu ṭhenkhat chu tlan hmasak inchuhin midang tana hlauhawm khawpa khalh ching an awm fo ta mai. Traffic jam karah line-a intlar a, a kal theih hun nghak duh lem loa hmaa mite tlan pelh hram tum an awm nual. Heng double orver-taking hi dan pawhin a phal loh a ni tih hre lem lo an tam mai. Hengho hi traffic police lam pawhin remchang laia lo tiding a, nunze mawi leh dan awm ang angte lo hrilhfiah an ngai hle.
Taxi kalhtute pawh tam tak chu passenger lak leh drop-ah an fimkhur lo hle. Passenger-te'n an lo phar a, an lo pharna zawnah midang ngaihsak lem loin an ding chawt zel a. Passenger lo pharna lai kha lirthei dang din ngai loa hmun thawl a nih chuan a zia viau, chutiang ni loa hnung lama lo tlante ti bahlah zawnga ding chut chut an tam mai. Passenger-in an lo phar a nih pawhin a piah deuh remchang lai zawn hram hram a ṭha khawp mai.
Kan city bus tam zawk fe hi a hlui tawh hlawm hle a, an hnunga tlan a hrehawm ta viau hlawm mai. Bus khalhtute hi a neitu pawlte aṭang thununna a ṭha viau. Mahse zirtirna pek an ngai leh ta khawp mai.
Entir nan Chanmari aṭanga Chaltlang inkar kawng chho-ah han zui i la, an tlan muangin an silencer khu a nasa si a, an hnunga tlan a hrehawm ṭhin khawp mai.
City bus khalhtute hi an induh ve hle. Bawngkawn aṭanga Ṭhuampui inkarah an hnungah zui i la, passenger an lak duh chuan an ding tawp a, midang kawng ken an tum lo hle. Chutiang bawkin Bawngkawn aṭanga Ramhlun kawng lama zui fuh tawh chuan ninawm duh tak a ni. An hmaah tumah tlan lo mahse, an hnunga mite'n pelh tum hian mi an kian hreh ṭhin hle. Traffic police lam hian han enfiah deuh teh se.
Tunah hian tow wheelers taxi a awm thar leh ta a, heng taxi khalhtute pawh hi a ṭhen chu an hawihhawm lo tlat. Midang tlan pel vur vur bik loa mahni hmaa mite rem leh rem loa pelh tum phet hi taxi fing tih tur a ni lo.
Kan traffic police ho hi tunhma aiin an fel a, an polite tawh a, an hmel hmuh pawh an nuam hle; fel vanga duh duhin traffic dan an bawhchhiat erawh phal tur a ni lo. Dan kalha lirthei khalhtute lakah chuan ri deuh ṭhak se, tichuan traffic rules kan zawm ṭha ang a, mipui himna leh traffic hmasawnna a ni bawk ang.
Lalkhirhvela