MNF-in an tihchian ran a ngai

Vanglaini website-ah han lut ula, February 9, 2018 kha han keu chhuak ula, "BJP nen inzawmna kan nei lo - Zorama" tih thupui a lo awm kuau ang a, chiang takin a hmuh theih a ni.

A hnuai in chhiar zel chuan - MNF president Zoramthanga chuan nimin khan North Vanlaiphai community hall-ah MNF Hrangturzo West & East Block Joint Conference a hmanpui a; kum 2018 Assembly inthlanah MNF-in thawhpui an nei dawn lo a, an mal din dawn tih a sawi a, BJP nen inzawmna an neih loh thu a sawi bawk.

MNF Prsident chuan, mi ṭhenkhatin MNF chu BJP nena inzawmna nei ang dawn dawna an sawi ṭhin thu sawiin, "BJP nen ngat phei chuan inzawmna pakhat mah kan nei lo leh zual a, kan thuthlungah chhim leh hmar ang kan ni," a ti - tiin a inziak a ni.

He mi hma deuh hi ni tain ka hria, BJP National Secretary for Scheduled Tribe Morcha Hayithung Bill Lotha khan Mizoramah BJP-in seat 40-ah MLA candidate an dah tur thu leh party dang nen inzawm an tum loh thu a sawi ve bawk a, heng mite pahnih thusawi aṭanga teh hi chuan MNF leh BJP hi inzawmna pakhatmah nei lo a ni ngei ang tih hi media lama an sawi dan chu a ni a, inzawmna nei lo angin an insawi a ni.

Tun hnaiah Meghalaya-ah BJP thurualpuite an chak a, anni lam hian MNF chu sorkarna an siam ṭuma lawmpuitu atan an sawm a, chu chu MNF thuchhuahah tarlan a ni. Hei hian MNF hi BJP nen an inthurual ta tihna a kawk chuang lova, MNF hian BJP sangawizawnpuite hi an sangawizawnpui tho a ni ve tihna a ni chauh a ni.

Mizo mipuiin kan hriat chian duh tak zawk chu MNF hian BJP hi an thlawp nge thlawp lo tih hi a ni. BJP hi vote hmuhna tur leh inthlannaa sum hman tur petu atan chauh thlawp theih an ni lova, BJP an thlawp a nih chuan BJP leh a chhunga thil inphum zawng zawng hi an thlawp tel a ngai dawn a ni. BJP nih vangin Hindu sakhaw betu an ni nghal tihna a ni lova, BJP hi Hindu sakhaw tihlar tumtu leh India ram hi Hindu rama siam tumtute an ni a, hei hi BJP thlawptu chuan BJP rilru leh BJP nihna a ni tih an hre tel ngeiin a rinawm.

BJP hian India ramah hmasawnna tam tak an thlen a, phat rual a ni lo. Congress pawh khan hmasawnna tam tak an thlen ve tho. Ka sawi tum lam chu BJP an ni emaw, Congress an ni emaw, Mizoramah chuan engmah a danglamna a awm tak tak chuang lo. Central-a Congress hlang an sorkar laiin Mizoramah Congress tho an sorkar a, state dang aia min duhsakna hmuh tur a awm lo. Central-ah sorkar an inthlak a, BJP ans orkar a, mizoramah Congress tho an sorkar a, Central-a Congress sorkar lai aiin kan hniam phah lova, min hrek hran lova, hma kan sawn phah chuang lova, central sorkar hruaitu inthlak hian Mizoramah nghawng sawi tham a nei lem lo a tih theih ang.

Tichuan, MNF chu ni ila BJP hian pawisa tam tham min pe dawn a nih loh chuan BJP hi thawhpui chhan tur a awm lova, BJP hi eng ang pawhin insawithiam mahse sakhaw behchhan political party an ni. Hindu rama India leh duhtu an nih avangin Mizorama Mizo dik takte thinlungah an tlana dawn si lova, BJP thurualpui hi vote nei ṭhiau Mizo tam tak thurualpui lohna a nih nghal dawn avangin MNF tan chuan thil hlauhawm a ni. MNF hian huaisen takin, chiang takin BJP nen an inzawm lo tih hi an puan chian a ngai.

Pu Zoramthanga hian Mizo Hnam Runah thu a sawi ṭhin a, hetah hian chiang kek kawkin BJP lam ṭang an nih leh nih loh hi tichiang se. BJP lam ṭang an ni lo tih a chian kâk hunah mipuiin Congress thlaktu atan kan ngaizawng thei deuh ang. Tunah chuan Congress thlaktu atan BJP partner MNF lakluh hi kan la duh lo deuh niin tlang titi aṭang hian a hriat theih a ni.

Tin, MNF tana hriat chian ngai chu Meghalaya leh Tripura result vanga kut lo ben ve mai hi chakna a ni lova, Congress paihna turin MNF hi an ṭha zawk a ni tih mipuiah an tihlan a ngai. Hei hi MNF hian an tihchian ran a ngai. BJP nen a rukin an inkawp nge inkawp lo tih tihchian a ṭul tluk zetin sorkar leh an duh a nih chuan Congress aia an ṭhat zawkna an tihchian a ngai.

Tunah hi chuan Congress lamin NLUP an hlawhtlinpui avangin chumi aia pawisa tam tawktarhin 'NLUP copy paste and edited version' SEDP an sawi ri a, hei hi chu tlin pui tur a la ni lo. Congress aia an ṭhat zawkna hi mipui hmaah an puan thiam a, an sawi rik theih hunah MNF dinhmun a ṭha ang. Tunah chuan lei chimte rang takin an han tlawh ngawt a, thil chhe lam a awmin news reporter thlen rual rualin rang takin an thleng ve a ni mai a, anmahni puala thil tih an neih ve a ngai a ni.

Tun hnaia Whatsapp lama thlalak darh chiam, MNF President Pu Zoramthanga leh BJP President Amit Shah ṭhut dunnate hi thlalak hlui tun hmaa mi a ni mai thei a, tun hnaia mi a thar pawh a ni thei a, hengte pawh hi sawi chian law law hi Mizo mipui lakah an tlaknat zawkna turin a pawimawh khawp ang le. June thla hmalam hian MNF hian thil tichiang hman se, Mizo mipui chuan kan come back tir hreh lovin a tinawm. Tunah hi chuan a la chiang lo ruai a ni.

LMS Ralte, Dinthar