I ram tan engnge i tih ve dawn?

US president hlui, Jonh F. Kennedy chuan, "I ramin eng thil nge a tihsak dawn che tihah buai suh la, ka ram tan eng thil ṭha leh hlu nge tih theih ka neih a, ka hnutchhiah ang tihah buai zawk rawh" tiin a sawi. Ram hmangaihtu inti tan chuan thuvawn, thupuia neih tlak a ni. Thinlung leh tih takzeta mahni ram hmangaihtu chuan a ramin thil a tihsak theih tur lamah a rilru a buai ve lova, a ram tan thil ṭha leh hlu a tih theih dan tur lamah a rilru a buai zawk ṭhin.

Ṭhalaite hian kan ramin a mamawh tur thil siam­chhuah tumnaah leh sum­dawnna chang­tlung tak din tumna kawngahte hian hma lain ṭan la thar ta ila a va ṭha dawn em. I ramin eng nge a pek dawn che a, eng sawrkar hna nge a pek dawn che a, eng thil nge a tihsak dawn che tihah buai suh. He ka ram tan hian eng nge kei hian tih theih ka neih, engnge ka hnutchhiah ang a, he ka ram tan hian eng tin nge ka tha leh zung hi ka thawh theih ve ang tih ngaihtuah la, i ram tana tih theih i neih ve tur thil ngaihtuahin buai zawk rawh.

Thiamna leh finna, theihna he i ram tan hian hman tur leh hlan tur i nei lo a nih pawhin ram hmasawnna tur zawng a nih chuan sawrkar hmalakna ang chite a ti khawtlai zawng leh a tibahlah zawngin che lo la. Sorkar thlawpa ṭanpuitu nih tum zawk la, chu chu i ram tana i tih theih ropui tak leh chhuanawm tak a lo ni ve mai dawn alawm. Mipuiin compensation kan duh luat avanga sawrkar hmalakna ṭhenkhat tihkhawtlai leh, ṭhenkhat a hlawh­chham tih thu hriat tur a han awm fo ta mai ṭhin te hi a va han zia lo ṭhin tak em.

Kan ram hruaitute pawn ka ram tan eng nge tih theih ka nei tih hi ngaihtuah fo ila. Mahni in haivurna lam ringawt ngaihtuah lovin ei leh in lama kan intodelh theihna tur te, sum leh pai lama kan intodelh theihna tur te, ramin kawng engkima hma a sawnna tur te leh, retheite an lo dinchhuah ve theihna tur lamte hi ngaihtuah ta zawk fo ila. Chu chu ram hruaitute pawhin ram leh mipuite tana in tih theih ṭha tak a ni.

He ram tan hian mi tu pawh mai hian tih theih leh hnutchhiah theih kan nei vek tih hi hre ṭheuh ta ila. Mahni ram tana thil ṭha leh hlu hnutchhiahtu nih tum ṭheuh bawk ang u. Chutianga kan tih ṭheuh chuan he ram hian hmuh theih khawpin hma a sawn ang a, kawng engkimah kan into­delh thuai bawk ang.

A der maia ram hmangaihtu chuan a ram tan eng nge tih theih ka neih tih aiin a ramin atan eng nge tih theih a neih, tih hi a ngaihtuah ber thil a ni. A ramin thil a tihsak tur lo thleng tur chu sakuh ser rah tla nghak an sawi ang maiin a lo nghak tlawk tlawk mai ṭhin a, sawrkar hna leh awlsam tea sum hmuh­na ni lo, hna dang hmanga mahni into­delh tumna a nei lo.

He ram, Mizoram bak hi ram dang kan nei lova, chuvangin he ram hmasawnna tur bak hi ngaihtuah tur dang kan nei lo. Chuvang chuan he ram tana tih theih i neih i hriat chu tunah ti nghal ṭheuh ang u le.

Nawlchunga Chinjah, Siaha