Khawvel nawmna

I hriselna vawng ṭha rawh - dam chhung tawite hrehawm tak maia hman chu tuman kan duh lo ang. Han thlir vang vang la, hospital-a awmho te chu i awt miah lo vang, a chhan chu natna chi hrang hrang vanga awm an ni. An duh vanga awm an ni lo, natna in a tlak buak te an ni hlawm. Hetihlai hian mi tam tak chuan keimahni dik loh vang leh fel loh vang hian natna tam tak kan insiam chawp ve bawk a lo ni.

Ṭhenkhat chuan zu, drugs, sex etc te kan ti nasa a, kan in thlahdah hle a, hei hian a hrin chu natna ṭha lo leh rapthlak tak tak te a ni. Tin, a fel a te pawh hian zuk leh hmuam etc kan uar lutuk, a result chu a hmasa a mi ang tho a ni. Kan hriselna a ṭhat loh chuan eng ang mi pawh ni ila kan khawvel hi a buai zo vek mai a ni. Kan hriselna a ṭhat chuan hringnuna harsatna eng eng emaw lo thleng ve ṭhin te pawh hi a tawrh dan a ziaawm ṭhin.

Taima rawh - Bible pawh hian mihring sum hlu chu taimak hi a ni, a tia. Thawhrimna reng rengah hlawhtlinna a awm, a ti bawk. Eng ang hna pawh thawk la taima taka i thawh chuan hlawhtlinna i hmu dawn a ni. Kan hlawh chhuah chu a tam lo a ni maithei, a hluin a lawmawm a, hman pawh a daihzai duh hle. Mi taima lo te hi an awm hahdam a, an awl a, mah se an hlim chuang lo, hna ṭha taka thawk ni leng ṭhin kha a hah na a, nuam a tiin a hlim daih zawk.

Zirlai angah pawh mi an lenvah suau suau laia mahni pindana khawhar taka lehkha bih ngat ngat ṭhin te chu hun a lo rei chuan an ding chhuak nge nge ṭhin. Thawkkhatlai khan kan officer-ho hi an awm nuam bik, induhsak bik, tih thawm kha a awm ṭhin a. Mahse, khatihlaia kan C.M khan engtinnge a chhan kha - thik tur an ni love, anni hi chu nuam taka in len vah mai mai laia krismas, new year pawh sawi lova rim taka lehkha bih ngat ngat ṭhin te kha an ni e, a ti.

Midang tan in hmang tam rawh - Mahni chauh in ngaihtuah hi a fel lo hle a, min tifamkim lotu a ni bawk. Tun hma deuh tawh khan U.K-a professor pakhat chuan ‘gentleman’ tih hi a hrilhfiah a - eng lai pawha midangte ṭhatna tur ngaihtuah reng, a ti a. Isua pawh kha gentleman dik tak a ni e, a ti. Mother Teresa kan hria ang a, midangte tana a neih leh hun tha hmang zotu a ni, a thih khan sari pakhat leh chapel pakhat chiah a nei, an ti. Mahse, khawvelah hian a hming a dai ngai tawh dawn lo a ni.

Tual chhung chanchinbu te han en leh ta la, a khat tawkin thisen unit chuti zat, chumite chuan a thlawnin an pe tih te, i hmu ṭhin ang. Eye bank te pawh kan lo nei ve ta a, nikum thleng kha chuan mit donate mi sang li chuang kan awm tawh a, mit pe tawh hi mi za thum vel bawr kan awm tawh bawk a ni, a ropui hle mai. Synod newsletter phek thumna kan thlir chuan midangte tana thilpek petute leh an thilpekte a tlar thla tuarh ṭhin. Midangte tana inhman tam hi a hlimawmin a rah chhuah pawh ṭha tak a ni ṭhin.

Tunge i nih in hre rawh- Mihring nihphungah chuan mahni inhriat hi a har hle a, kan ṭhat lohna lai leh fellohna lai phei chu in hriat har tak a ni. Hetihlai hian midang te ṭhat lohna lai leh diklohna lai erawh kan hre langsar duh hle. Mite nena intih thiam loh nikhua pawn mahni diklohna te pawm thiam thei zel ila buaina a punlun lo vang a, keimahni tan pawh a hahdam thlak zawk dawn a ni. Kawng dangin han sawi leh ta ila, politician-in ram rawng a bawlnaah sum leh pai a ngaihtuah tel chuan a dik thei lovang, ram hruaitu chuan mahni indah ṭhain rawng a bawl tur a ni si a. Chutiang bawkin sawrkar hnathawkin neitu rilru a put loh chuan a famkim thei lo. Zirlai pawhin zirlai a ni tih a in hriat loh chuan a hlawhtling thei lovang.

Eng ang mi nge ka nih, thin chhiang e, zaidam, mi fel tak nge fel vak lo etc tih te han in chik ve mai mai ṭhin ila. Nakinah, engemaw hunah “E, kei chu chutiang mi chu ka nih kha” a tih theih dawn a ni. Mahni inhriat hi a pawimawh hle a, kross a Isua an khen beh pawh khan a vei lama mi kha chuan a in hre hauh lova, a ding lama mi erawh kha chuan khenbeh tlak a nihzia kha a pha hauh lo, thil ropui tak a thleng zui ta nghe nghe a nih kha.

Nawmna leh hlimna kan zawng a, kan hmu hlei thei lo, a ṭhen zu leh sa lamah te kan tlan a, hei phei hi chu min tihrehawm zualtu leh kan nun titawitu mai a ni. Hringnun kawngah hian tumah hlim reng, nuam reng, kan lo awm chuang lova, Siamtu-in min duan dan a, thu awih taka kan nun mai hian kan dam chhung tawite hi nuam tak leh hlim takin kan lo hmang mai dawn a lo ni.

Lalchhandama Colney