Mi fing an tho tlai ngai lo

Hma takah mu la, zing takah tho la, Bible chhiar la, i inchhir ngai lovang. Khawvela kan cham chhung reiloteah hian ringtute hian mamawh pathuam kan nei a, chungte chu hlimna, hriselna leh finna a ni.

Taimakna leh rinawmna, dikna leh inngaihtlawmna te hi kan nitin khawsakna, eizawnna leh nunah hian min kaihruaitu a nih chhung chuan hlawhtlinna leh hma­sawnna in min hmuak ang. Ram leh hnam hmasawnna hnukpui chu kan thinlungah hian Lalpan a dah ṭheuh a, kan hman thiam leh hman thiam loha thu a ni mai.

Hausak thut tumna, eirukna leh hlepruk duhna thinlung (moral corruption) hi sum leh pal itna leh thinlung leh rilru sual min puttirtu a ni. Vawikhat chu Pu J. Thankunga (Man Hausa-a (L) fapa) Ex-MLA hi mi tlawmngai Vanapa Hall bulah ka hmu a, "Hotupa i va tho zing ve" ka ti a, thil danga min chhang ta lo chuan - Pu Hlupui, "Mi fing an tho tlai ngai lo" a ti hmiah mai a, ka thawh hma deuh hian ka hre reng ṭhin.

Lal Isua, Tirhkoh Paula, mi fing Ma­hatma Gandhi, Abraham Lincoln leh kan Pastor zahawm tak takte pawh hi an tho tlai ngai lo. Kan veteran Politician Pu C. Chawngkunga te, Brig. T. Sailo (L) Ex. C.M te pawh an tho tlai ngai lo.

Kiltheihrawk hi sava zinga tho hma ber pawl a ni a, thing leh mau vahchereu lohnaa ka kal leh riah chang chuan varṭianah zing takah an hram lauh luah ṭhin.

Tunah chuan, February thla kan lo hmang zo leh dawn der mai a, hun leh tui lianin tumah a nghak si lo. Chutah kan Kut nghakhlelh ber zinga mi Chapchar Kut a inthum rawn tluk tluk a, kan hmang zo leh ta mai a. Kan pi leh pute hun lai leh ram buai hma Mizo nun mawi te pawh min ngaih tir rum rum ṭhin.

Ṭuahpui leh Vau te pawhin par an chhuang leh tawh si a, Ainawn leh Senhri parte pawh thin­laiah an hlui chuang lo. Kan sul i hnu khuarei an chang zo ta, hmangaihna leh hmangaihtu Lal Isua Krista nei ve lo tan chuan lunglen hnem-tu an awm lo. "Awi ka nu/ karei Lucknow" tih ve mai awl tak a ni tlat a ni.

Engpawhnise, kan thlen chin aṭang khan hma i sawn zel ang u. Mi fing an tho tlai ngai lo. Mizo kan ni kan hmel a ṭha, kan tum a sang bawk si.

H.F. Rohlupuia (Freelance Journalist)