NLUP Kutpui kan hmang maw!

Congress sorkar chuan NLUP kutpui chu kar khat dawn zet a hmang a, he kut hi mi thil chik mite leh neutral tam tak rilruah erawh a tla na teh chiam lo niin a lang. India rama sorkar sum hmanna endiktu sang ber CAG report meuh pawhin a hlawhchhamna report mualpho taka a puan tawh ‘NLUP kutpui’ an hmang ngam hian mi tam tak mak tih a hlawh a ni. CAG khan NLUP dawngtu mi 7942 an kawm a, chung zinga 1400 chu NLUP dawng thei lo tur an ni tih an hmu chhuak. Sorkar hnathawk dawngtu pawh 67 zet awmin, Pensioner 213 an awm bawk.

Sum hman dan pawh CAG hian an audit a, a tak taka sum hman aia tam an hmang anga ziah a tam tih an hai chhuak nual nghe nghe. NLUP hi kan sorkar hotuten a ṭhatzia hahipin an sawi a, ‘Pathian programme’ tih te, ‘India rama project ṭha ber’ te an ti ṭhin. Sorkar Programme ni si, mitin huap zo lovin party bil induhsak nan an hmang a. Synod Social Front zir chiannaah khan NLUP dawngtu 98.6% chu an duhsak zawng Congress Party mi leh sa vek an ni.

Kum 2008 MLA General Elecction dawnah NLUP scheme-ah cheng hnih pe a, sorkar tuka cheng nuai khat dawng turin mipuiah an inzuar a. Sorkar tuka sem chu sawi loh, kum 2008 kum tawpah an sorkar a, kum 2009-ah an la sem lo a, kum 2010-ah pawh an la sem chuang lo. Kum 2011-ah mi tlemte hnenah instalment-in an pe ṭan thei chauh a. An campaign lai khan kum 5 chhungin cheng nuai khat sem turin an insawi a, an term hmasaah khan an sem zo hman ta lo a, a term hnihna tawp dawn lamah an sem zo tawk a. Pocket money ang lek leka an sem avangin tu tan mah han din chhuahpui ngaihna a awm lo.

Mizoram Congress sorkar hian a flagship programme ‘NLUP’ ah hian cheng vbc 2800 (tluklehdingawn 28) zet sen a nih tawh hnuah ei leh barah hmasawnna thar hmuh tur a vang a, tlang ram lo neih leh hal pawh a la tlak hniam phah hek lo. DDK leh media lama kan lo hmuh ṭhin NLUP hnuaia hlawhtlinga an chhal Kolasib leh Mamit District-a Kuhva chingtute lah tuna NLUP an kal pui hma daih kum 15 aṭanga kum 20 kal ta aṭanga bul lo ṭan daih tawh leh hlawhtling tawhte an ni. He ta ran vulhtute lah hman aṭanga Bawng lo vulh hlawhtling tawhte an ni a, mipui bum tumna mai a ni.

Kan la theihnghilh hman awm love, NLUP hnuaiah bawng hrisel lo an lakluh avangin kum 2012-2013 chho khan Sihphir, Durtlang leh Lungdai velah Bawng an thih phah vak a. Burma vawkte hrisel lo an chawk luh nasat avangin kum 2015 chho khan Vawk pulhri PRRS len vangin Vawk tam tak an thih phah vak tawh bawk. NLUP Kel an lakluh vanga State Animal Saza za chuang thi-a chhar te, thlai thar market mumal awm hauh lote hian NLUP hlawhchhamzia a lantir.

Tun Congress sorkar­ah hian hmasawnna infra­structure mumal siam belh a awm lo a, sorkar department tin maite hian development work an khawih lo, an kal ngaiin an kal che che ringawt a ni. ‘NLUP hi Prime Minister Special Package aṭangin kan sem ang’ an ti a, mipui bumna bawk a ni. Mizoram budget aṭanga an sem avangin sorkar department hrang hrangte hian hmasawnna hna dang thawk thei lovin an ṭhuanawp phah a nih hi. Mi nuai chuang fein NLUP an dawng a, hetih lai hian khaw tin leh veng tina NLUP hlawhtlinpuitute hi kut zungṭang thliaka chhiar tham pawh an awm mang hauh lo a ni tih hre chiangtute vek kan ni.

Election dawn ruaiah an hlawhchhamzia hliahkhuhna tur leh vote zawn nana NLUP kut an hmang hi chu ‘Tlawng vuaka Mat dap’ an sawi ang vel chauh a ni e.

Lalthanliana, Salem Veng, Aizawl