MZP ve si... Vishal a lo ri nawn ṭhin!
Khatia kan ṭhalai ramri humhalh duhtute Assam police hovin silai nena an lo beih chiam takah kha chuan Mizorama hnam dang (vai) dawr khar tur an ti a, Vai dawr chu rang tak takin an khar an ti a. Vishal kha an khar ve ta nge ta lo tih ka he chak khawp mai.
Vishal buaipui luih luih a nih lai khan MZP te khan hmuhsit an tawk a ni mai lova, an diriam zui a, an Mizo pui an hnam humhalh sak an tumte khan ‘vai bungraw man tlawm’ duhtute khan fiamthu thawhna atan tak hmangin an nuih a, “MZP ve si...” tiin an nuih kha a ni.
Tunah chuan hnam thil issue dang a lo lang leh ta a, Bairabi bula Zophai chu humhalh a ngai ta a, chuta che chhuakte chu ‘MZP ve si’ an tihte tho kha an ni leh si. Vishal an duh loh an lantir khan MZP kha pawl tenawm leh ṭawp, vai pawisa khawn mai maiah kan puh a, kan ten thu te hial kha kan sawi niin ka hria a, tunah erawh MZP lamah kan zavaiin kan ṭang ta ṭhup a ni.
MZP sum hmuhna a dik emaw dik lo emaw, MZP hruaitute hi politics-a career zawng mai mai an ni emaw ni lo emaw, zirlai pawl hruaitu zirlai ni tak tak si lo an ni emaw ni lo emaw lam hi chu keia sawi ve tur a ni lova, kei chuan MZP in hnam issue an khawih ṭhin tih hi ka sawi tum chu a ni.
MZP-in Vishal an buaipui khan hnam thil a nih vang a ni a, mahse Mizote hian hnam thil hi kan hekna tur a nih chuan kan duh lova, tlema kan hlawk hretna tur kan nih chuan hnam thil hi kan dah pawimawh em em lo tih chu Vishal-ah khan a hriat a ni.
MZP chuan “Vishal hi a ṭobulah hnam dang an awm avangin he dawr lian hi Mizoramah kan duh lo, hnam dang ta a ni,” ti ang deuh khan thil an sawi a, Mizo mipui chuan, “An hralh tlawm thei alawm,” tiin pawisa tlem tea a tlawm zawk kan um avangin hnam kan hralh dial zawk a ni mai lo maw?
Tuna MZP chan a ṭhat tak deuh hnu hian MZP hi khatih hunlaia ka thlawp ngaiin ka la thlawp reng a, vai dawr an duh loh kha ka la thlawp reng. Khatih hunlaia vai dawr rim nam a nih vanga MZP chet dan demtute khan hnam thilah chuan “MZP ve si...” hnam thilah chuan an che chhuak ṭhin tih hi lo hre nawn ve se tih hi ka mimal ngaihdan a ni tih ka rawn puang ve a ni e.
Lalthanmawia