MNF SORKAR-A MINISTER 12 KAN HMUHTE

US President Goe Biden emaw, Prime Minister Narendra Modi pawh ni se, tunlai thiamna changkang (Information & Technology) ‘Internet khawvelah’ chuan an khawsa zia leh nungchang (behaviour) tam tak kan hre thei deuh vek tawh a.

MNF sorkara a hnarkaitute pawh hmaichhan (face to face)-ah kawm kher lo mah ila, term chanve an hman chhunga an thusawi leh thil tih, an awmdan (attitude) hrang hrang aṭangin kan hre chiang thawkhat tawh. Tawi téin Minister 12 te thlirna han neih ve ka chak tlat a ni.

1. Zoramthanga CM :
December ni 15, 2018-ah MNF sorkar lakluh a ni. Chief Minister Pu Zoramthanga chuan zu zawrh a khap nghal a, CAB 2016 a do a, CAA chuan min a hlahthlem (exempt) a. Kawng siamṭhat hna puiah a nei a. Aizawl traffic jam sutkianna chi khat atan February 2019 ah PAHOSS atan Rs. 10 crore a dah. June 2019-ah District thar pathum tan cheng 150 lakhs ṭheuh a dah. June 2019 vekah SEDP atan cheng 750/- crore a dah bawk.

Hetiang a nih lai hian Aizawl khawpuia ‘kawng chhawng’ siam, Assam Rifles sawn chhuah tih chu a reh zui hmak. SEDP cheng nuai thum sem pawh a sawi ri ngai tawh lo. SEDP (2020-2021) sum chu department pariatah cheng nuai 3,918.58 a sem thung. SEDP pawisa chu - Lengpui Arport thuam­ṭhat nan nuai 507.75, Ma­mit multipurpose indoor stadium atan nuai 412.38, Public Work Department-ah nuai 2056.54, Transport directorate building esca­lation rulh nan nuai 174.24 etc. tih vel te a ni.

Kum 3 dawn an sorkar hnuin kuthnathawktute lam hawiin SEDP a puahchah lo.

2. Tawnluia Dy. CM :
Vanduaithlak takin natna khirh takin a tlakbuak. Dy. Chief Minister Pu Tawnluia hian department pawimawh tak tak, UD&PA, PHE, DP & AR te a enkawl a ni. Depart­ment pawimawh tak enkawl chung leh, bial vawng chung chuan tuna a taksa hrilselna dinhmun hian term lehpek chu a tlin tawh kher lo mai thei. 2023 MLA inthlanah a hmel kan hmu leh kher ange maw?

3. Dr. R. Lalthangliana Minister :
An sorkar tirh phat, January ni 10, 2019-ah Health Minister Dr. R. Lalthangliana hian recognised blook bank-a thisen sawngbawlna man (blood processing fee) tihtawp a nih thu a puan bak chu, sawi tham thil tih ṭhat a nei zui vak lo. Covid-19 chungchangah pawh Health minister a nihna anga a tihtur chin pangngai a tih bak chu, state dang health minister te aia a chungnunna a awm hran lo. A hah erawh an hah ang a. Party chhungah hamṭhatna pek bik nei nia puh a ni a. A department enkawl directorate lam hotu sangte thunun zo lo, kohhran lamah tih bik nei nia hmehbel tlat a ni.

4. Lalchamliana Minister :
Home Minister Pu Lalchamliana hi ngawi renga thil zir mi a ni a. Publicity a ngainat lohna hi a hlawhchhamna pakhat a nih hmel. DM&R changtu a nihnaah pawh mizoram khawchhak lam lirnghing leh Myanmar aṭanga raltlan, kuhva phurhluh, ramri buainaah te che chhuak ngai lo, ‘aw’ pawh nei ngai lo, ‘Home Minister ngawi reng’ tih a hlawh phah a. Pa biak nuam lem lo, bial mipuite paw’n an nêl vak loh, 2023 MLA inthlana a hmel kan hmuh zui tawh loh tur nia rin kai a ni.

5. R. Lalzirliana Minister :
P&E Minister Pu R. Lalzirliana hi Congress sorkar-a a tel lai angin a thawm a na lo hle a. Mi ṭhenkhat chuan a tui miah lohna Power & Electricity an enkawltir vang a ni, an ti. Hma thar zuan turin Officer, Engineer rualte kohkhawm pawh a nei ngai lo niin an sawi. MNF ministry-ah hian a tuitla hleithei lo ni a sawi a awm bawk. Pa ṭawng phawng phawng chi a nih avangin, tunhnaia Electric bill tihsan kawngah pawh chai rawn a hlawh phah viau.

6. C. Lalrinsanga Minister :
Agriculture Minister, Pu C. Lalrinsanga hi mi chak vak lo, thawm pawh nei lem lo, a pangngai a ni deuh ber awm e. Central sorkarin scheme thar a siamte a nang fuh a. Land development lamah pawh hma an la thar nasa a, a tan chuan a nihlawhthlak hle ang. Hetih rual hian thu themlem te te sawi a chîn avangin, a programme neih laiin a department officer te an inmitsir relh relh ṭhin niin an sawi.

7. K. Lalrinliana MOS :
Supply Minister, Pu K. Lalrinliana hi langsar vak si lo vin, MNF sorkar tihmingṭhatu a ni. Mipui nitin mamawh enkawltu a ni a. BPL/AAY te ration chini a thlawnin a pe a, buhfai a chhêkkhawl ṭha a, buhfai chhe lâk a phal lo va, state sorkar sum tel loin godown tam tak a sa thei. Petrol, diesel, eirawngbawlna Gas pawh a lalut ṭha. Fisheries Minister a nihna ang pawhin Sangha note sorkarin a sem ṭhin pawh a duhtui hle a, a fakawm khawp mai.

8. Lalchhandama Ralte MOS :
School Education Minister, Pu Lalchhandama Ralte hi MNF sorkar hnúa mahni department enkawl hnuaia hnathawktu (MR Teacher) 881 zet la thei awmchhun a ni a. A lak dan phung erawhin sawisel a hlawh hle. Thiamna leh theihna inang rau rauvah duhsak tur duhsakna chang hre lova puh a ni a, politics-ah ama thlan laia ngai nghet tlattu an tam. A department enkawl hnuaia hna lian awmah mi tu emaw thurualpui nei nia puh a ni a. Officer lian te misguide angin; an hna lak result tarchhuah anih laiin a zin bo ziah ṭhin niin an sawi bawk.

9. Lalruatkima MOS :
Rural Development Minister Pu Lalruatkima hi Opposition lama a awm lai angin, an ruling hnuah thawm a nei ta lo va!. MGNREGS, ni 100 inhlawhnaah fak chiam tum pawl awm mah se, central scheme a nih angin state dang te aia tih ṭhat bikna a nei lem lo. RURBAN, Material Component, BADP hna leh Departmental works a khawih danah; sawi deuh sep sep a kai niin an sawi a, social media lamah pawh khel a hlawh fo.

10. Dr. K. Beichhua MOS :
AH&Vety Minister, Dr. K. Beichhua hi MNF sorkar flagship programme SEDP tihlawhtlingtu awmchhun ti hialin a sawi ngam ang. Ar (rainbow rooster, broiler) leh Vawk vulh tur SEDP Pilot project kalpuitu leh, a taka tlêm azâwng tihlawhtlingtu a ni hlauh va. A hmalakna la beitham hle mah se, a chhuanawm ve hrim hrim.

11. TJ. Lalnuntluanga MOS :
E&F Minister Pu TJ Lalnuntluanga hi Minister-ah a hmalakna langsar vut si lo vin, tih ṭhat erawh a nei tam hle. Zofate inunau nan Manipur, Tripura leh Myanmar ah Transport Bus tlan tir a han tum tlat mai te, Bangladesh nena kan inkalpawhna tura a hmalakna te pawh a chhuanawm. Aizawl khawpui chhunga Two Wheeler Taxi permit a pe chhuak pawh, miin eizawnnan, chhungkaw chawmnan an hmang a, fak loh rual a ni lo. Minister zinga naupang ber leh first timer MLA a nihna erawh Assembly house chhung leh pawnah a lang zauh ṭhin.

12. Robert Romawia Royte MOS :
Sport Minister, Pu Robert Romawia Royte hi MNF sorkarah tel lo se, he sorkar hian hmalakna lian tham sawi tur leh inchhuanna an nei lo maithei. Sorkar cheimawitu ber tih theihna a tam. Mizoram budget aṭanga finance minister-in state marching share (SMS) a dah hmang ṭangkaitu ber a ni a. Central sum a hailuh aṭanga sports infrastructure developmet a siam zawng zawng hi fak phu tak vek a ni. Chutih rualin Media láwm mah maha sawi a ni a. A tan hian popularity khelh a ngai hran tawh chuang lo, tih hrilh ṭhintu awm se, a ṭha ngawt ang.