HENGTE HI...

1) Ramria chengte hi eng nge an chanchin? Khaw dang aṭanga zuk kala, hawsan leh hi chu thu khat a ni a; chenchilhtu nih chuan a dan a dang daih ṭhin. Ramria chengte awka hriat a chakawm.

2) Art of War zir kan va mamawh em! Chinese pa fing Sun Tzu-an indonaa thisen chhuak titlem tura ral rel dan bu a lo ziah, 'The Art of War' tia an lehlin tak hi a chhiar thei chuan zir vek a ṭha. Art of War bel taka hre tan chuan tuna thil thleng hi engtin nge a kal dawn tih a tir aṭang khan a chiang. "Indo hun leh indo pumpelh hun hre hrang rawh: nangmah aia chak tur tih chiang sa chu hel la, a chak loh hunah bei rawh. Hmelma bum dan thiam rawh: i chak loh laiin chak angin inlantir la, i chak laiin chak lo angin inlantir thiam rawh. I chakna leh i panna lai inhre rawh: i hmelma i hriat chian a, mahni i inhriat chian bawk chuan indona za chuang pawh hmachhawn la, i buai lo vang." Ram hruai hna thawh tumtute leh ram chhan hna thawh tumtute chuan zir ngei ngei chi. Vawi khat chet chhiat a pawi lutuk.

3) Sap ṭawng hi! Kan journalist te leh politician te nen tiamin zir kan la ngai hle mai. Kan dinhmun chiang taka Sap ṭawnga inziak chhiar tur a vang pharh. Sapṭawng dik lova ziah a tam em em thung.

4) Buh, buh leh buh: Urban development aiin rural development a pawi­mawh zawk tih a lang. Thlang lam aṭanga thil kan chawk luh chu sawi loh, Burma aṭanga thei kan lak luh pawh a zuartu ṭhenkhatin an lo tito hman a. Rilṭam chungin huai a har. Nupui fanaute an ril a ṭam phei chuan a har lehzual ngawt ang. Mi zai thiam sela, a ril ṭam si se a tan eng nge sawt ang? Mi inkhelh thiam se, a ril ṭam si se a va khawngaihthlak dawn em!

Mi in leh lo nuam takah chengin Versace leh Gucci dik takin lam thlap thlap se, a ril ṭam si se a changkang thlawn a ni. Thil dang hi chu thil dang a ni.

Ram, hnam, sakhua humhalh turin buh leh bal a pawimawh hle.

Zoramsanga