ZOPHAI BORUAK

Zophai hi Mizoram mipui maiin an ngaihven lo a, Assam mipui pawhin an ngaihven. Hei mai hi a ni lo, India sawrkar pawhin a ngaihven lo thei lo a, Union Home Minister dawhkan pawh a nghawr che dawt hial a ni. Zophai Pu Ch Chhunga leilet bulah hian March 14 khan boruak a sang teuh hle. Media report pangngai ang ni loin, a hmun a thil thleng ka han ziak ang e.

Zophai hmuna buaina a chhuah apiangin chanchinbu mi kan nih angin ka awm ve ziah a, huaisen vang ni lem loin buaina hmun kan awm chilh hnaih avangin kut pawh kan tuar ve ziah hlawm. Mi huaisen leh pasalṭhaah chuan kan inchhal lo na a, buaina inṭan chhoh dan hi chu Zophai hmunah na na na chuan kan hre chiang thawkhat a ni.

Zophai a buaina chhuah dan hrim hrim kha chu a ṭum khatna leh a ṭum hnihna kan sawi chiang tawk tawh a, thual nawn pawh a ngai lo turah ngai ang.

Bairabi-ah hian Zofate chawlhbuk sak tum a nih aṭang khan 1st IR Battalion, Mualvum te chu Bairabi Police Station lamah an inkulh char char tawh a, chuta awm tura thupek an nih avangin an awm hmun an sawn thei lo. Zophai-ah Chawlhbuk sak ṭhat tum ṭum hnihna a thlen hnu khan Union Home Minister beng a thleng ta a, Mizoram sawrkar leh Assam sawrkar chu buaina tireh tura ramria Police dah tura tih an ni.

Zirlai kawng zawh ni a ni a, Mamit lam aṭangin IR an rawn thlen belh bawk a, Mizoram IR te hi 200 rual Bairabi-ah an awm ta a, Mizoram IR-te hi zirlai pawl vaw tura awm an ni hran lo. Zirlaiten kut an tawrh hnu kha chuan an khawsazia erawh a danglam ta khawp mai.

Bairabia ramri kawngzawh neih zawh hlim khan Bairabi aṭangin Zophai kan va tlawh a, Pu H Thangzuala 1st IR Commandant, Mualvum pawhin Zophai piah lam Mizoram ramri thleng a lo va tlawh chhuak hman vek tawh a, Commandant a nih angin hmalak a tum dan leh ruahmanna an siam dan pawh kawngpui sir leiah ziak meuhin min hrilh nghe nghe a ni.

Hei bakah hian, ‘Chawlhbuk sa nawn leha kalte engtin nge an venhim ang a, nunna a tam thei ang ber engtin nge an venhim theih ang?’ tih enfiahin Pu Joseph Lalchhuana, DIG nen Zophai an enfiah vut vut mai a ni. Mizoram IR-te hi Assam Police-te kap tura tih ni lo mah se, chawlhbuk sa leh tur venghim tura tih an ni tawh a, an nunna an venhim dawn chuan Assam Police lamah silai an kah a ngaih dawn tlat avangin, an tan position lak dan tur pawh an Commandant hian a hrilh fel thlap a ni.

Zophai hmunah hian rin aiin huaisen a har duh. A chhan chu Assam ho ṭan hmun hi a ṭha zawk hle a, Zofate Chawlhbuk sakna hmuna awmte hi inkahna pawh awm se, Assam Police hian min ruang chaicheh nghal a ni.

Kei ni phai zawlah kan awm a, phen tur a van em em na a ni a, Assam Police ho hi Chawlhbuk sakna piahah an awm. Tlanga an camp aṭangin min chhuk bih ngur mai bawk a; amaherawhchu, Mizoram IR-te an an silai nen an han inrem ve a, an han meng tur khui mai chu Assam Police leh an IR leh CRPF ho kha chu an hawi hruk hruk a... Chawlhbuk sakna hmun thlanga hnim buk hlim pawh an insawn san ta daih a ni.

Mizoram IR-te Zophaia an inkulh hnu hian a ralmuang kan tih rualin Haikandhi mipui lam kha an ralmuang lo ve ta thung a ni. ‘Ramri hi remna nen sawi ni rawh se...’ an ti ruai tawh a, ‘March 20 i nghak ang u...’ an ti hlawm a ni. Assam Police lal ho pawh buaina beng daih tumin Zophai lamah DG Border hoin an kal zut a, Zophai aṭanga inhnuhdawh an rawt ruai mai a ni. Anmahni lamin an Police-te an dah hmasa a, Mizoram sawrkar hian Mizoram police-te hi hnukdawk hmasa lul suh se.

Zophaia chawlhbuk sa tur hian silai mu dawng thei renga KM 1 vel zet kal a ngai hi a buaithlakna lai tak a ni a, silaia inkah ni ta se kan thisen chu a chhuak hnem phei hle ang tih a chiang hle. Engpawhnise, Union Minister berin ramri chungchangah inbiakna nei turin an rawn ti ta a. MZP te chu CYMA leh Kohhran lamin an lo ngen ve bawk nen, Zofate Hnatlang pui a koh chu a ṭhulh ta a, buaina chu a chhuak ta rih lo phawt a ni. MZP-te hian ramri piah lamah phuba lak duhna rilru nei vaih se chu, tunah hian kan dam chhuak a nih hlauh chuan, kan thu ziah pawh a danglam hle ang tih a rinawm.

Engpawhnise, MZP hmalakna chuan nghawng a nei thui hle a, March 20 hi thlir ṭhup phawt mai teh ang. He mi chhung hi chuan zalen vek ni mah ila, a inṭhendarh zawng hi chuan ṭawng cheh lo hram ila a va ṭha em.

Zomuanpuia Tlau, Kolasib