Assam Rifles chhuah hun tur
Kan Chief Minister ngeiin Chapchar Kutah Mizoram mipui pun khawmnaah ngei kum 2019 khan Lammual aṭanga Assam Rifles chhuah tur thu a puang tawh, mah se tun thleng hian an la chhuak miah lo a ni.
Hemi hnu hian AMC inthlan dawnah Assam Rifles chhuah tur bâkah midang um chhuah hual an la neih ṭeuh thu a sawi leh a, hei pawh hi tun thleng hian a la thleng dik lo zel bawk a ni.
Assam Rifles hi chuan chhuah hun chu an la nei ngei ngei dâwn a, a chhan chu an luah tur ram Zemabawk chhak tlang leina atan politician ṭhenkhat tiamin chhungkaw tam tak an hausa thur thur tawh a ni.
Contractor te pawhin an luah tur quarters an sâ peih diam tawh tih hi Beraw Tlânga kan kalin ka mit ngeiin ka lo hmù ve tawh a ni.
An hmun hma neih tur hi a ṭha si a, Lammual hi kan hman theih tho chuan awm zel law law mai se Zemabawk tlâng hi Mizoram sorkar hian nei let leh nghe nghe thei se a itawm zawk.
Ministry of Home Affairs-in an insawnna tur hmun an siam fel diam tawha insawn chhuah ve mai awm a nia, an la awm nghet tlat hi engnge a chhan ber ni ta ang? Tih hi mipuite zawhna inzawh loh theih loh chu a ni.
An chenna in sak vek tawh, electric connection pawh a awm tawh a, tin hei bakah hian kawng pawh laih tlang vek a nih tawh avangin Assam Rifles hi insawn chhuak thuai thuai se a ṭha ang.
An chhuak a nih chuan MNF sawn chhuah a ni dâwn lova, Congress sawi chhuah pawh an ni dâwn lova, ZPM hek chhuah pawh an ni dâwn lova, MHA-in chhuah a hun tawh an tih hun hunah an chhuak dâwn a ni.
Assam Rifles chhuah tur thu velah hian Chapchar Kut vela mipui lo play kualna chi a ni lova, an chhuah leh lovin a sawitu zawk kha a sawn chhuak theitu emaw tiin an sawisel zui mai mai ta ṭhin a ni.
Mahni thawh chhuah ni lova hming ṭhat tum hi ṭul lova hming chhiatna a ni daih thei si a.
Lalrammawia