MPSC-ah rinna kan nghat ngam ang em le?

Tun hnaiah hian hna ṭau ṭetin MPSC hnuaiah hna hrang hrang lak thar mek a ni a, lak thar tur pawh a tam hle. Mizoram sorkar hnuaiah hian hna hrang hrang lak ṭhin te, a bikin department lamin an lak te hian chanchin neuh neuh a nei fo a. A chang chuan Hnam Run list tih te, Bhavan list tih vel hi a ri fo bawk.

Hna lian leh sang lem lo a nih ṭhin vang hian sorkar lai na na na chu lo induhsak in, eng emaw sawi deuh hat pawh awm se la, kan hrethiam viau a. Tun hma deuh khan chuan Police te phei chu intlar hlei lova tling tih te pawh an awm a, mahse, hna lian lem lo leh Department lam lak na na na chu hrethiam lo thei mah ila kan phung lungawi mai mai lo thei lo ṭhin a.

Mahse, MPSC hnuaia hna lak hi chu tlemin a lo sang deuh bawk a, chuvangin dik leh fel tur ngaihna pawh kan nei lian viau mai. Kum kha leh chen hna chi hrang hrang an lo lak tawhah khan chanchin sawi tur ting a thawm mawi lo tlem tlem chu awm mahse kan

ṭhenawm state te PSC ten en chuan la zia tak niin kan hre ṭhin. Amaherawchu, hmani lawkah MPSC hnuaiah nurse an lakah chanchin mawi lo a awm ta zauh a, sorkar lamin an han cancel vei lailawk a, boruak a reh deuh hnu-in an cancel tawh chu an pawm leh tih thawm te an awm leh a; a zia lo hle mai.

Tun dinhmunah hian MPSC ah hian rinna hi a la bo rih lova, mah se a kal zel ang a, enge kan an zel ang chu aw tih sawi a har. Hna sang leh lian chauh dik a, a hna tenau deuh zawk lama dik loh ngawt a rem dawn lo. Sorkar hna a mi hming ṭha te bakah Pastor hna meuh kalsan Chairman na hnuaiah hian Mizoram ṭhalaite hian rinna kan nghat ngam ang em tih hi zawhna lian a ni ta. Sorkar lai lam hian an duh duh an tuai leh mai mai theih loh tura thunneihna nei an nihna lam ai hian a duhsaktute party mi leh sa hi lut ta ṭeuh mai sela kan ram tan hian a va raptlak dawn em. Kan MPSC meuha rinna kan nghat ngam lo a nih chuan in kan ṭhalai te tan chuan beisei tur a awm tawh lo a ni tawh mai.

Political Party chuan duhsak zawng an nei a, contract an sem pawhin rorel lai party mi leh sa tan lo chuan beisei ngam chi a ni lo. Police ah pawh MA te tla hi mak kan ti lem lo; Police lakna a ni a, department chhunga lak a ni a, tu mahin fair tak tak turin an beisei ngam lo. Home Minister meuhin fair takin kan la dawn ti kuk kuk mahse la, khawiah mah hian a fair seng dawn lo tih chu mi mawl ber pawhin kan hre vek awm e. Mahse, beisei chuan tur nei lo, rorel lai ni ve lo, party belh bik pawh nei lo; mah se hna leh nihna beisei te rinna hi MPSC-ah hian a innghat mek a ni tih hriain, kan sorkar pawh hian ṭhalaite beiseina hi zahsak sela, MPSC huang chhungah hi chuan in rawlh lo hram se.

GST John