NLUP Kut hmang

Zonet Zing Daifim ni 7-3-2018 kha ka lo ngaithla a, NLUP Kut hawn a nih thu te, kan CM-in a hawn thu te, NLUP hlawhtling leh ti ṭhate thawh chhuah a dawr hawn a nih thu te, chung an thar chhuah chu man tlawm zawka zawrh a nih thute a puang a. A tawpna berah thil hrang hrang an zawrh thu a puan rualin Zupui leh Zufang thlengin a awm thu kha a puang a. He thu han ngaihthlak hian NLUP nge nge a va ropui tak em, thar chhuah loh aram a nei lo a ni ber a, kan va changkan phah dawn tak em ti tein mi a ngaihtuah tir a!

A enga pawh chu ni se NLUP hi kan sorkar hian hlawhtling hle hian a sawi cham chi a, a hlawhtlin puite hi han sawi fak tur an van hmel hle lawi bawk si a. Kei ni thingtlang khaw lamte hi NLUP-in a tuam nasatna hmun kan ni a, hetiang khua reng ruangah hian NLUP hlawhtlin pui han sawi fak tur chu an vang pharh ang lawi si! NLUP hi an dawn leh dawn loh hriat hleih theih loh khawpa rukin kalpui a ni a, mahse ṭhenawm hnaivaite na na na chu TV emaw Bike, Scooty, Fridge etc, an han lei hian ‘E, NLUP a dawng a ni ang’ te kan in ti vel mai mai kha a ni a. An thlawhhma lakah han changkan phahna hmuh tur a awm mang hlawm bawk si lo. Bawng, Vawk, Ar vulh thlangte hi chu hriat loh theih a ni lova, khawl lam thlangte pawh; tihlaiin huan thlai lam leh mau chin lam thlangte angte hi chu hriat an har khawp mai.

Hetiang hi a nih laiin kan sorkar lahin hlawhtlin pui nasa hleah a sawi bawk si a, a hlawhtlingte hi khaw hla deuh lam mi an ni duh zek leh nghal a, chuvangin hriatthiam a har khawp mai. Tin, zupui leh zufangte hi NLUP trade-ah khan a lo awm ve reng emaw ni le? Tihlaia NLUP dawr lama an lo zuar tel vet lat mai hi special permit an nei nge, NLUP fakmawi kan tum lutukna ni ang le? A enga pawh chu ni se MLPC Act hman a ni mek a, chutihlaia sorkar pawhin a phal loh leh a ven ber zu hetia ualau taka zawrh a ni tlat mai hi chu a fuh lo. Sorkar ber hian bih chiang deuh teh se.

NLUP hi thil ṭha tak a nih chuan a dawng turte pawh hi a ualau thei ang berin thlan ni sela, a ruk arala thlan a, a ruk a rala sem a nih chhung hi chuan tunge dawng, tunge dawng lo tih pawh kan hre thei lo. Hetihlaia kan hotuten a hlawhtling tia an puangzar vak mai hi a fuh ber awm lo e.

Khawi maw laiah chuan hlawhtlin pui an lo awm ve mai thei a, side dang aṭanga an pawisa hmuhin a ṭanpui vang pawh a ni thei.

Thingtlang khaw tam takah hi chuan NLUP dawng tawh tam takte hi chu ala dawng hauh lote ai hian an chawrche zawk awm asin le! An danglamna ber chu sorkarin pawisa sem tur a neiha an bengvar em emna hi a ni chauh zawk awm e!

Heng zawng zawng aia pawi chu NLUP Kut ni a, NLUP dawra Zupui leh Zufang a lo awm reng mai kha a Kristian lo. NLUP trade-ah khatiang kha a awm a nih pawhin tun hnuah chuan awm tawh lo rawh se.

Patrick Z. Chhingchhip