Khawpui ṭhang dik leh ramngaw

March 21 hi ‘International Day of Forest,’ World Forestry Day tia an sawi bawk, ramngaw hlutna leh pawimawhna inzirtir tharna ni atan United Nations General Assembly-in a puang a, kum 2012 aṭang khan kum tin hman ṭhin a ni. He ni pawimawh tak hi thupui bik neia hman ṭhin a ni. Heng thupuite hi Collaborative Partnership on Forests (ram hrang hranga ramngaw humhalh kawnga thawk ho pawl) ten an thlangṭhin a; kumin thupui atan “Khawpui ṭhang dik leh ramngaw” (Sustainable City and forest) tih chu thlan a ni. World Forestry Day atana March 21 thlan a nih kher chhan hi chhun leh zan rei zawng a inchen ni, ‘spring equinox’ a nih vang a ni bawk.

Ram ngaw leh Mizote
Mizo te leh ramngaw hi kan inngheng reng a, tun thleng pawhin ram ngaw leh a hausakna hmanga eizawng kan la ṭhahnem hle a. Ramngaw kan humhalh vanga Sap Kristianho au eih kan ni a (Zairema, 1978), chu kan humhalh chin vêk, Bristish sawrkar-in kan kuta a dah (Inner line Forest Reserve) chu tun hnaia ramri-a kan buai thar lehna lai chu a ni bawk. Ei leh bar zawnna kawngah, khawtlang nunphung leh sukthlek leh hnam nun thlengin ram ngaw hian nasa takin mi a nghawng a ni.

Ṭhangtharten ram ngaw enkawl dan kan thiam loha leiah kan ram ngaw te kan chan ṭeuh tawh a, kan ti riral a, mimal ram a tam tial tial a, ngaw a chereu tial tial thung; loneitu ten loa an neih tur vantlang ram a zim tial tial thung. Mirethei zawkte tan ei hmuh vena kawng a harsa tial tial a, thlawhhma siam thei te pawh a ngaia an kualzin avangin ram a leng rei thei lova, ram a tui lo tial tial a, thlai an thar ṭha lo tial tial bawk.

Ram insem zai dan rual tawk loh avangin ram nei lo an tam tial tial a, vantlang ram a tlem tial tial bawk avangin Revenue Minister, Pu R Romawia chuan mangang takin “Zamindari System kan hlat lo…” tiin a lo sawi chhuak hial a nih kha (Vanglaini, 23.01.2014).

Ṭhangthar lehzual teah ram ngaw hlutna a ṭhang chho leh mek thung. A zirna hmunpui kan neih chinah phei chuan nasa takin ram ngaw humhalh kawngah kan harh thar leh a, tlawmngai pawl hrang hrang ten beih tak zeta an beih aṭang phei chuan India rama ram ngaw nei zau berte pawh kan ni leh ta hial a ni. Chutih rual chuan ngaw dur (126 Km²) erawh a nei tlem zinga mi kan ni thung lawi a (ISFR, 2017).

Ram ngaw enkawl dan (forestry) leh Mizoram
Forestry subject zirna hi NEHU-Mizoram Campus-ah 1990 khan din ṭan a ni a, zir tur te duang fel a, zirtirtute an lakkhawm hnua zirtirna an kalpui ṭan tak chu kum 1997-ah a ni. Mizoram Univeristy a lo din hnupawhin Forestry zirna hi chhunzawmzel a ni a, tun thlengin M.Sc aṭanga Ph.D thleng zirna kalpui a ni a, Mizoram mai bakah India ram hmun hrang hrang aṭangin zirlai an fuan khawm ṭhin.

Ram ngaw enkawl lam zirna kawng hrang hrang leh zirbingna chi hrang hranga khawvel hmahruaitu nih a, ram ngaw leh nungcha tinreng humhalh chunga retheihna um bo kawnga ram tana thawk tur mithiam chher chhuah hi MZU Forestry Department hmathlir duhawm tak chu a ni. Chumi tihlawhtling tur chuan nasa takin kawng hrang hrangin hma a la mek a ni.

Sorkar laipui pawhin Forestry zirna hi a ngai pawimawh hle a, Under Graduate lamah chuan ICAR hnuaiah awmin B.Sc (Forestry) hi kum 4 zir a ni a, M.Sc programme erawh UGC hnuaiah awmin kum 2 zir a ni thung. Tin, India sorkar hian heng, Forestry lama thiamna neite hlutzia hi hriain State leh Indian Forest Service lamah te pawh duhsak bik an nih tur thu chiang takin a ziak bawk (National Forest Policy 1988: 4.11). Ziaka a duhsak a ngai erawh chuan State leh Central Sorkar hian a bik takin a duhsak bik chuang lo niin a lang. Mizoram Forest Deparment lamin thawk tur chi hrang hrang a lakah pawh hian duhsak bikna chu sawi loh, dil thei zinga an telh miah loh ṭum a tam ta mai. National Forest Policy hi ennawna siam ṭhat mêk a ni a, tuna an duan chhinah chuan ‘forestry lama zir thiamna neite duhsak bikna’ lam hi a chuang ta rih lo thung. Zawm loh pui policy-a dah reng ṭul an ti lo a ni mahna!

Khawpui leh ramngaw
Ram ngaw hlutna hrang hrang an sawi zinga sawi lan hlawh vak lo chu ram ngawin khawvel tilumtu carbon a up bo nasat thu hi a ni awm e. Tun hnaiah Bhutan ramin ram ngaw a humhalh nasat thu leh carbon negative ram an nih thu a thang nasa a. A awmzia tawitein tarlang ila, “Bhutan ramin lirthei, industry leh mihring chet velna hrang hrang hmanga carbon an tihchhuah aiin an ram ngawin carbon a ei a, a up bo a tam tihna a ni,” chu miin chiang taka a kawh chu ram ngaw an nei ṭha hle tihna a ni.

Ram ngaw chereu chak chhan lian tak chu mihring chet velna chi hrang hrang hi a ni. Heng hmasawnna ruhrel nia an sawi ṭhin tam tak - khawpui tih zauh nana in leh lo din a, ram ngaw ṭhiah te, khawpuia mi te mamawh tur siamna leh thar chhuahna tur hmun hrang hrang din nana ram ngaw tih danglamte hi a zual kai ber ni si, an puh phal si loh a ni (Ramakrishnan, 2012).

Mihring kan pun zel avangin chenna kan mamawh belh zel a, ei tur kan mamawh belh zel bawk a. In kan sa lo thei lo a, thlawhhma kan zauh a ngai bawk ṭhin. Hei vang hian thlawhhma kan siamna leh in leh lo kan dinnaa ram ngaw kan tihchhiat ai hi kan chenna, kan khaw chhehvel leh khaw chhung thlengin a remchang laiah thing hmun kan siam a pawimawh a, chutiang tih theihna hmun pawh chu kan zuah a pawimawh hle.

Khawpuia thing hmun
United Nations-in kumin World Forestry day puala thuchah a siam, khawpuia thing hmun awm ṭhatna leh ṭangkaina a sawite tawi te lo tarlangila:

1) Ram ngaw leh thing te hian boruak tilumtu nasa taka a thunun avangin khawvel sik leh sa danglam zel tur pawh a veng thei.

2) Thing leh mau te hian sik leh sa vawnhim kawngah nasa takin hna a thawk a, boruak tih daih nana kan power mamawh zaa 20 - 50 zetin a ti hniam thei.

3) Awmze nei taka khawpui leh a chhehvela thing phun hian 8°C zetin boruak a tidai thei a, air conditioner mamawhna pawh zaa 30 zetin a hniam phah thei.

4) Khaw chhunga thing te hi boruak thli fimtu ṭha tak a ni a, boruak chhia leh bawlhhlawh leng vel a thlifim thei.

5) Khaw chhung leh a chhehvela ram ngaw hi tuihna vawnhimna ṭha tak a ni a, lei min tur venna a ni bawk.

6) Thingkung leh mau te hian ri bengchheng lakah nasa takin mi a veng thei.

7) Khawtual mite tan a rah, a pil leh a hnah te ṭangkai taka hman theih a ni.

8) Khawpuia thing hmun awm hian nungcha dang tan chenna a siamsakin humhalhna hmun ṭha tak a ni.

9) Khaw chhunga ngaw leh thing hmun awm hi khaw cheina ṭha tak a ni a, khualzin hipna hmun ṭha tak a nih bawk avangin mi tam takin eizawnna an neih phah tawh a ni.

10) Khawpui chhunga thing leh mau, ngaw leh phul hmun awm te hian nunphung hrisel leh rilru hrisel nei thei turin mi a tiphur a, chu chuan nasa takin hriselna kawngah mi a pui bawk.

Tlipna
Ram ngaw humhalh leh enkawl kawnga ṭhangharh thar leh mek, Mizo te hian kan ram ngaw hlutzia kan hriat thar leh a pawimawh khawp mai. Kan rohlu kan ram ngaw te tichhetu chu huai taka kan do ngam a ngai. Ram ngaw humhalh vanga Chanchin Ṭha dawng, ram ngaw humhalh avanga ‘mi lu la hnam’ tia hriat hlawh kan ni tih i hre thar leh ang u. Kan tih chhiat palh te siam ṭha turin ṭan kan lak a ngai.

Rimawi ram, herhse leh ngiau par rim lenna rama siam leh turin, hawh u, thingkung awm sa te hi humhalh ila, awmze neiin mahni ram thing ngei, kan hip ṭhan boruak pe chhuak thei ngei, ram dang thing ni lo phun bawk ila, enkawl puitling zel bawk ang u. Kan khawpui te hi chenna tlaka hmun hring nuam zawk, khawpui hlim leh hrisel zawkah i siam ang u.

Reference:
ISFR, 2017. India State of Forest Report 2017. Forest Survey of India (Ministry of Environment & Forests). www.fsi.nic.in
Ramakrishnan, P.S. 2012. Hill agriculture: vulnerability and management options. National Workshop on Green Revolution in Mizoram. AMFU
Zairema, 1978. God's Miracles in Mizoram: a glimpse of Christian work among head-hunters (In: Lehkhabute Pasarih. Ed: Revd Chuauṭhuama). Zorun Community, Zarkawt, Aizawl.
http://www.fao.org/internation...
https://www.vanglaini.org/tual...

Dr. David C. Vanlalfakawma, SERB-National Post Doctoral Fellow