Engvangin nge Mizoramah electric bill a san?

Kum tin kawlphetha chhit man Mizoramah a sang ṭhin a, eng nge a chhan kan tih chuan a chhanna tawi thei ber chu kan sorkar fawng vuantute, a bik takin Chief Minister, Power Minister leh Electric Department-a thawk JE aṭanga E-in-C (project buaipuitute)-ten sum an khawih chingpen ṭhin vang a ni, ti ila a fun kim tawi ber mai awm e.

Mizo mipuiten bill kan chawi tam chhan tawi tea kan sawifiah hmain Delhi mipui Mizoram let 20 aia tamten êng chhit man an awl theihna chhan tam tak zinga pakhat chauh tarlang hmasa ila a fiah mai awm e.

Delhi CM, Kejriwal-a leh a hote chu eiruknaah an fihlim a, sorkar hnathawk eiru a hrem ngam a, an ban ngam bawk a. Chu bakah contractor hna thawk ṭha lo hun tiam chhunga zo hman lote an hna an cancel a, a ṭul angin an hrem ngam bawk. Heng bakah hnathawh tur an ruahman reng reng original estimate siam aia tlemin hna ṭha takin an zo ṭhin a ni.

Entirna pakhat chu Delhi khawpui Wazirpur kawng chhawng siam nana cheng vaibelchhia 315 an ruahman chu cheng vaibelchhe 200-in ṭha takin an dawh zo thei a, vaibelchhe 115 an hum (save) a, khutiang khuan Mizoram sorkarin vaibelchhia 115 hum thei ve ta se, NLUP atan Mizo chhungkaw 1150 hnenah kan sem thei dawn tihna a nih chu.

Mizoramin kawlphethaa kan intodelh loh chhan kan sawi kha tawi te bawkin sawi zau ta ila. Tu ram leh khawi state chungchang pawh sawi dawn ila, a ṭhat leh chhiatah hruaitu lu ber kan sawi lo thei lo ang bawkin Mizoram chhiat leh ṭhat thuah pawh kan hruaitu lu ber, Chief Minister te kan mawh lo thei lo a, kum 20 chuang CM ni thei leh ni rei ber Pu Lalthanhawla'n mawh a phur ber a tih loh theih loh bawk a. Tun ṭumah pawh Pu Hawla kan lepse leh dawn a ni. Pu Zoramthanga erawh chu CM ni lai leh eng chen nge a la CM dawn tih kan sawi theih loh avangin kan lepse rih lo ang. Chief Minister a nih loh hunah kan la lepse ve ang chu.

Pu Hawla sorkar chhunga kawl­phetha siam chhuah nana project an siam pahnih an hlawhchham nasatzia leh sum an khawhral tamzia a hnuaia ka tarlan aṭang hian hre duh tan chuan a chiang thei hle ang.

He project thawktu chu M/S Eastern Oversees Corporation a ni. Hetiang hi an pawisa sen ral dan chu a ni:

Tuipang Hydel Project:
1. Original
Estimate - 1991 - Rs. 980 lakhs
2. Revised - 1996 - Rs. 1,935 lakhs
3. Re-revised - 1997 - Rs. 2,958 lakhs
4. Re-re-revised - 2000 - Rs. 3,721 lakhs

Tichuan, original estimate 980 lakhs aṭangin 3,721 lakhs-ah a kai chho ta a ni.

Kau-Tlabung Hydel Project:
1. Original
Estimate - 1991 - Rs. 482 lakhs
2. Revised - 1996 - Rs. 2180 lakhs
3. Re-revised - 1998 - Rs. 2518.73 lakhs
4. Re-re-revised - 2000 - Rs. 3253.03 lakhs

Tichuan, original estimate 480 lakhs aṭangin 3252.03 lakhs-ah a kai chho ta a ni a, hei hi an senso tawpna a la ni lo.

1. Kawng laihna:
Internal road 1.68 km Rs. 10,50,000.00
Approach road to project 8 km Rs. 49,00,000.00
Bailey Bridge 1 km Rs. 42,00,000.00
Sub-Total Rs. 101,50,000.00
2. Building sakna 31 nos including Office building
Sub-Total Rs. 104,50,000.00
3. Motor leina
Gypsy 12 nos Rs. 27,50,000.00
Truck Chasis 1 no. Rs. 15,00,000.00
JCB 1 no. Rs. 15,00,000.00
Bulldozer 1 no. Rs. 22,00,000.00
Sub Total Rs. 79,50,000.000
4. Forest Department hnena compensation Wapco hnena consultation leh a dangte:
Rs. 284,92,000.00
Grand Total Rs. 543,42,000.00

Heng project bakah Serlui ‘B’ Pu Hawla leh a hoten electric watt khat pawh siam chhuak loin Rs. 5,43,42,000 an hmang ral a, an hluihlawn der bawk, an pawisa hman ral dan chu hetiang hi a ni:

Pu Hawla kum 20 CM chhunga a kawlphetha siam chhuahna tura sum a hman ral zat hi Delhi CM khuan hmang ve sela chuan Mizoram in tin leh mi tin hian eng chhit man kan free vek bakah kawlphetha kan siamchhuah state danga kan hralh chhuah hlep chuan Mizo mipui zawng zawng hi a thlawnin buhfai (ration) kan dawng vek thei ang. Chief Minister ṭheuh ṭheuh, mipui rawng an bawl dan an inang lo a ni e.

Mizorama electric bill a san zel chhan kan sawi ta a, Delhi CM, Arvind Kejriwal-a miin a thlawna electric bill, tui bill leh damdawi etc. a sem theih chhan an zawh a chhanna chu, “UP BJP Chief Minister-in ama mimal (private) thlawhtheihna cheng vbc 191 man a lei ang khu lei ve loin Delhi mipuite tan kan hman vangin a thlawnin mipuiin an dawng thei ṭhin a ni,” tia chhanna hian engkim a sawifiah fai chiang hle a ni. Entawntlak a va ni tehlul em!

MC Lalrinthanga