THAWNTHU HLUI CHU MIN HRILH RAWH

Civil Hospital, Lungleia hman tùrin CLP Leader, Zodintluanga chuan, June 26, 2020 khan RT-PCR khawl a pe tawh a nih kha. Kha khawl lainatawm tak kha engtin tak awm zel ang maw? Pék a nih hnu kum khat leh thla hnih hnuah hian thawnthu hlui i han thar thawh leh dawn teh ang. Thawnthu hlui inhrilh nawn fo hi a ṭul tlat.

Thawnthu hlui chu -
1) October 7, 2020 (Nilai­ni) Dingdi chanchin­buin a tarlan danin, Dr. R. Lalthangliana, Health Minister chuan, Covid-19 endikna RT-PCR khawl CLP Leader, Zodintluanga pek chu a bunna tur ngaihtuah mek a nih thu a sawi.

2) Dr. Thangtea chuan, Lungleiah RT-PCR khawl bunna tùr labo­ratory din a nih theih nana hma la tùrin Lunglei HPC Vice Chairman, Lawmawma Tochhawng leh Dr. K. Pachhunga bakah, hetiang kawnga mithiamte an ruat tih a sawi bawk.

3) Dr. Thangtea chuan, RT-PCR khawl chu a man a to chiam lo tih a sawi a, chéng nuai 20 man chauh ni mah se, a dahna tùr room buatsaihna leh a thawktu tùr senso a sang zawk a ti a, thawktu mi 10 vel an awm a ṭul thu a sawi bawk.

4) Mizoram sorkarin ni 10 chhung leka Covid-19 endikna tùr laboratory a din fel thei kha Indian Council of Medical Research (ICMR) in mak an ti hle tih Dr. Thangtea chuan a sawi bawk. Tin, Nagaland-in ni 32 chhunga laboratory an din kha chu keini din ang kha chu a nih ka ring lo, a ti bawk.

Thawnthu hlui point no. 1 : Dr. R. Lalthangliana, Health Minister-in Lungleia Covid-19 endikna RT-PCR khawl bun tùrin kan ngaihtuah mek a tihna hi thla thar October 7, 2021 hian a kum 1-na cham kan lo thleng dawn ta. Sorkar (Ministry) hian a tih tùr a ti ṭha duh lo a, a bik takin chhimbial mipui a ngaihsak tawk lo tih a chiang.

Thawnthu hlui point no.2 : Health Minister-in a ruat anga Lunglei tana hnathawk ṭha duh lote chu, HPC Vice Chairman Lawmawma Tochhawng leh Dr. K. Pachhunga leh helama mithiam an ruatte hi an ni tih a chiang hle. Lunglei MLA an nih angin RT-PCR khawl dah ngei tùra sorkar nawr a, MLA aṭanga ban hial ngam khawpa chhimbial mipui tana hmahruai tùr zawk an ni dawm lo'm ni.

Thawnthu hlui point no.3: Dr. Thangtea hian Covid-19 endikna laboratory-a thawk tùr zat chhut chhuak sa thlapin, mi 10 vel an thawh a ngaih tùr thu a sawi a. Tun thlengin a thawktu chu sawi loh, laboratory pawh an la din duh lo a ni zawk si a.

Thawnthu hlui point no.4: Mizoram sorkarin Covid-19 testing laboratory ni 10 chhung leka an din theih thu a sawi a. ZMC-a ni 10 chhung leka an din theih kum khat leh thla hnih hnua Lungleia din a la ni lo hian ngaihtuahna a ti thui khawp mai.

A tlipna -
Covid-19 hri avanga Mizoram kan buai mup mup lai a, chhimbial inhman ṭawm tùr RT-PCR khawl MNF sorkarin Civil Hospital, Lungleia a bun duh lo hian an Politics duh chhiatzia a tilang chiang hle a. Lunglei MLA pahnih chhimbial tana an ṭan nat ngam lohzia a lang chiang hle bawk.

PIL hial thehluh hnan ngai sorkar hi a mualpho chiang hlein a hriat. Hetiang issue lian leh pawimawh ang hi mipuite'n kâr lova kan theihnghilh zui mai a hlauhawm hle a ni. Tlai khaw hnuah an rawn din leh a nih pawhin, he thil hi chuan 2023 MLA General Election thleng nghawng dawt teh se.

David Zochhuanmawia (Vida Hrahsel Saza)