INEPNA A LA TAWP THEI LO - RAMRI SAWI THLEN A HUN TAWH EM?

Mizoram Police leh Assam inepna a la tawp hlei thei lo a, Assam lam hian a thawl lai deuh an la melh ve reng niin a hriat bawk. Nimin lamah Aitlang kan zuk tlawh a, sawrkar hmalakna a turu hle. A hau tak hmel hle mai a, sawrkar thahrui hian eng chen nge a tlin ang tih hi ngaihtuah tham tak a ni.

(Hmuh dan te dah tel a ngaih nual avangin, News report pangngai ni lovin kan ziak dawn a ni. Zmp Tlau)

Aitlang kan han tih mai hi ralkhat aṭang chuan ngaihtuah thiam ngaihna awm lo khawp a tlangdung pharh thui a ni. Aitlang hmun hrang hrangah hian camp a awm thluah a, Assam lam dinhmun ai chuan Mizoram dinhmun eng emaw thleng thutah pawh a ṭha zawk. Aitlang lam hi Hailakandi District lamin an rawn nawr a, Hailakandi lam hian Zophai lam hi an chan a ni bawk. Hailakandi lam hi thawk an la deuh nge ni a, chance dang an zawng tih hriatthiam an har hle a, an Police camp a duty te hna ber chu inbual chhawk ni berin a lang rih. Nimin kan kal lai pawh hian kan hmuh phak lawkah an inbual chhawk tlut tlut mai a ni.

Vairengte Auto stand leh Saihapui V bakah Buarchep leh Saipum lamah Cachar District lam aṭangin Mizoram an nawr bawk a, Vairengte Auto Stand lam hi chu CRPF lam an duty uluk a, Saihapui V lamah pawh CRPF an duty uluk ta hle. A boruak pawh a reh ruih a, buaina hnai lutuk awm lovin a lang. Tin, kawng a hnai ve ve a, chaw inpek vel pawh a awlsam. Bungraw thiar luh a awlsam em em bawk a ni.

Aitlang leh Buarchep-ah hian Mizoram leh Assam lam tan chet a harsa ve ve a, Assam lam hi an la che khawr lehzual. Mahse, Assam lam hi an indaih em em thung a, an budget leh an indaihna hian Mizoram chal delh an tum ni berin a hriat a, tu daih rei rei tiin awmhmun an khuar nghet hle. Inkah lam an rilruah a awm vak lo niin a hriat a, Mizoram lam hi tam hneh an tum phawt a, ni 26-a Vairengte Auto Stand-a thil thleng avang khan tam policy aiin daih rei policy an hmang ta niin a hriat bawk. An Police te hi inbual suah suah nileng reng ringawt mai a ni.

Serlui bial hi buai bitna a ni ta ber mai a, mamawh a tam si. Assam lam lah budget nei sa thlapa rawn che an ni a, Mizoram sawrkar lah a ba hlirin a che thung. Assam lam an chetna apiangah chet lak a ngai a, ramri buai ngah bialtu MLA Pu Rinsanga Ralte hi lu pang leh lam na reng ang a nih a rinawm. Mizoram Chief Minister mipui nuai 13 vel neiin Assam Chief Minister mipui nuai 370 vel nei chetna a khing a ni a, a thu baka pawisa thawh tur a la nei rih lo a ni maithei. Ba a tam tawh ngawt ang.

Tuna a lan dan chuan Buarchep lam hi Cachar hian thapui an la thawh zualna hmun niin a hriat bawk a, he lai hmun hi buaina a awm leh a nih pawhin buaina chhuah theihna ber a la ni. Saipum lam hi chu a mipui zingah ralhrat an tam a, ramhnuai chet an thiam bawk nen Assam tan hian tharuma nek chi an ni lo vang.

Hun leh tha sum leh pai ramri lamah luang ral nasa a, Aitlang leh Buarchep hi chaw inpek ringawt pawh a hautak fal nalh. An riahna buk lah chu thli leh ruah regular taka tawrh nan a duhawm lem lo viau bawk a ni. Bungraw supply tur hrim hrim hian Home Guard te hi dah ni se, a fuh viau maithei a ni.

Hetianga innek policy hi hman a nih reng ringawt chuan, lo indep puak palh awm leh thei a ni. Mizoram Police leh Assam Police nilenga inentir ringawt hi tihtawp a nih theih nan leh RAMRI tak tak kan sawi thlen theih nan; Mizoram Chief Minister hian "Hello Himanta" a tih hi a hun ta viau niin a lang.

ZMP Tlau