MZU Sports leh a behbawm

Mizoram University hnuaia College hrang hrang te leh a hming tumtu MZU ten zirna in sang 33 (University 1+ Sawrkar College 24, Law College pakhat telin + Professional/ Kohhran/ Private Colleges 8) te pualin infiamna chi hrang hrang 10-ah intihsiakna tur a buatsaih a. Kuminah hian Institution 21 - Aizawl khawpui chhunga zirna in 11 leh Aizawl khawpui pawn zirna In 10 ten discipline 10 ah an intihsiak dawn a ni.

Infiamna lamah chuan kan ram ngaihsan rawn a ni bawk a, football kan dah sang hle. Games & Sports MZU-in a conduct ṭhin hi infiamna lama zirlaite talent hai chhuahna a nih mai bakah inpawh tawnna leh inpumkhatna atan tih a ni ṭhin. Chutihrualin, engemaw chang chuan chak kan duh luata leiah, in epna leh in tihbuaina nasa tak a thleng ṭhin. A tihrehna nia ngaiin, buaina chhuah tam ṭhinna ber football chu Lunglei-ah leh Champai-ah te vawi khat ve ve conduct a ni tawh.

Kuminah hian sports item zawng zawng Aizawlah vek khelh a ni dawn a, ṭha taka an zawh theih beisei phawt ila. A huaihawttu/ official ten hlei nei lo leh pawnlam mi te thunun phak loh tura huaisen taka an kal ngam erawh a pawimawh hle ang.

Tunlai khawvelah hian Higher Education leh sports hi kal kawp tura ngaih a ni tawh a, ram changkang, entir nan, US-ah phei chuan an Olympian ho zawng zawng chu zirlai deuh vek an ni. 2016 Rio Olympics-ah khan zirlai Stanford University aṭangin mi 27 in medal an dawng a, California, UC Berkeley aṭangin 22 leh Univ. of Sou­thern California aṭangin mi 21 laiin medal an dawng. Kumin (2018) Winter Olympics, Pyeongchang, South Korea-ah phei chuan Univ. of Southern California aṭangin mi 309 laiin medal an dawng a, Stanford University aṭangin mi 307 leh California University aṭangin mi 254 laiin an dawng; an theuneu lo hle.

Kan ramah hian zirna in hmasawn se kan tih rualin infiamna lamah pawh India ram mai bakah ram dang pawh el pha hial ila kan duh ṭhin. Chu chu a tak taka thlentir kan duh chuan kan zirlaite kan thawm ṭhat a ngai ang. Tuna kan dinhmunah hi chuan Aizawl khaw pawn college

aṭanga MZU sports-a tel zawng zawng hian khawpui chhung College-ten cheng khat mah an sen lohnaah sing tel fe, ṭhenkhat phei chuan nuai tel hial an sen a ngai. Kuminah hian MZU Sports Committee chuan fund a awmm theih chuan Aizawl pawn college-te TA one way pek ni se tiin a rel; an pek theih ngei pawh a rinawm. A lawmawm khawp mai.

Ngaihtuah chian ngai erawh chu sports lam promote kan tum takzet chuan MZU pawhin Sports Organize nan a budget a siam ṭhinah khawpui pawn college te tan full TA/DA (including food & lodging) a tel ngei a ngai. Tun dinhmunah chuan, MZU Sports hi College changtlung zawk, sum leh pai ngah, Home advantage nei ṭha bawk te leh thingtlang college, college rethei zawk, dinhmun inthlau lutuk te inelna a ang. Aizawl khawpuia college lian te Championship inchuhnaah college dang te an tel ve ang lek a ni. Thingtlang lam college tan chuan chance a vang khawp mai.

Tun Budget Sassion-ah khan sports lam tihchangtlunna incentives a lan thu sawi rik a ni a, a lawmawm takzet a ni. H&TE buget-ah pawh hian he lama hmalakna tur lang zel se. Sport lam ti thei zirlai tam tak hi thingtlanga piang leh seilian an ni. NEHU hnuaia kan awm lai (1996) Best Athletes for Girls pawh thingtlang lam college a kal a ni. Sport lama ram pum huap hmasawn nan thingtlang lam college ngaih pawipawh a pawimawh hle.

Thil pawimawh deuh mai pakhat leh chu, state dang tam takah chuan college-ah hian Physical Education Director/ Assistant Director/ Instructor/ Coach cell hran an nei ṭhin. UGC pawhin Sports Infrastructure changtlung zawk (Stage III) dawng thei tur phei chuan chutiang neih chu a phut tlat a ni. Tunah hian MZU hnuaiah chutiang post chu College-ah nei kan awm hlawm si loh avangin sports lamah kan dawn tur ang kan dawn theih loh phah. (Thawktute zinga Physical Education Degree nei awmna college te erawh chuan chance an nei hlek).

Chuvangin, Mizoram Uni­versity hnuaia college zawng zawngah hian Physical Edu­cation Instructor/ Coach, Master Degree with B.P.Ed/ M.P.Ed/ Diploma nei pakhat ṭheuh tal awm thei se’ng chuan sport lamah kan ram hian hma a sawn chak phah ngei ang.

Dr. Lalsiamhnuna