Bye Election, MNF last chance

Vanduaithlak takin Tuirial Bialtu MLA zahawm tak Pu Andrew H Thangliana chuan min lo boral san ta a, kum 43 mi chauh, politics lama hmabak eng tak nei chunga a liam ta vut mai hi a uihawm khawp mai. A nupui fanaute Pathianin thlamuan zel se, a hmun ruak a biala bye election awm hunahte an khúa a har thar lehzual ṭhin ngei ang le.

Tunah chuan Tuirial chu bial ruak a nih avangin an inchuh a ngai dawn ta phawt mai. Inthlan ṭhat (bye election) lo awm tur hi Mizorama political party pathum tán a pawimawh dâwn tih chu hriat sâ a ni a, Ruling Party MNF tan hian a pawimawh lawr lak a ni.

He Bialah hian MNF hi an tling zo lo a nih leh ngat chuan kum 2023 ah pawh an tla dâwn tih hi a chiang tlukah a ngaih theih tawh dâwn a ni. MNF tán chuan he inthlan pawimawhzia hi a chiang ta viau a ni.

Serchhipah mualpho takin an tla tawh a, tunah an tlak leh chuan sorkar laia bial hniha tla thei Party chu a rang a ranga chhuahsan vang vang chi a nih dâwn rualin an tlin erawh chuan 2023 inthlan boruak ti ṭhatu a ni ve leh daih thei bawk ang - chuvangin MNF hian chak ngei ngei tura an beih a ṭul dawn a ni.

MNF lamah hian candidate tur hi set thiam a ngai dawn khawp mai. Serchhip lamah khan MLA ni lo zinga an rawng huai an ser a, Pu Vanlalzawma kha a tling zo lo tlat mai a, Bye Election a ni chungin Ruling candidate nih hi a phurawm vak loh dan a awm ve tlat.

Tunah hian Pu Sailothanga Sailo hi an din tir leh dâwn nge ni ang hman ni lawka Kawnpui lama boruak zuk nei deuh hak Pu C Lalramzauva, Chief Minister Adviser kha nge ni ang midang zawk an awm em? tih chu inrin siak bâk tih theih a awm ta lo phawt mai.

ZPM hian tunge an vawrh chhuah thung ang le? Serchhip lama Pu Duhoma a tlin chian em avang khan zuam ngawt chi a ni bik hauh lo ang. Tunah chuan mi thar an zuan luh dâwn avangin Pu Duhoma a bial ngaia a kal ang kha chu a ni tawh dâwn lo. ZPM hian an hruaitu lawk aṭangin candidate hi an set ang nge, khu lai bial lo beiseitu an tihte aṭangin nge midang mi thar hlak an candidate ang? tih pawh thil hriat chakawm lutuk a ni ve leh bawk.

Hei bakah hian Cong­ress party an la awm ve. Term hmasa sorkarna siamtu an ni tih theihnghilh mai lo ila! Chu bakah chuan Pu Hmingdailova Khiangte kha term hnih (kum 10) Congress MLA a nih theih avangin a lu nunga chhiar chuan mi leh sâ hi an la ngah dâwn a ni. Congress hi Bye Election lama beiseina nei chu an ni dâwn lova, mahse midang tlin leh tlin loh tur hriltu an nih ve theih miau avangin Congress role hi a pawimawh ve leh khawp ang.

MNF tán chuan 2023 lama tlin nawn leh an duh chuan Tuirial Bial Bye Election hi 'Last Chance' tak tak a ni dâwn a, tun hi an chak loh chuan beisei a bo ang. Tuirial bialah hian an tlin chuan an phûr thar ve leh dâwn a ni.

Lalremruata