Jungkook-a Piancham An Lâwm E…
Tûnlaia rimawi khawvêl rûntu chu khaw chhak lam mipa pasarih awmna boyband BTS (Bangtanboys) te hi an ni. Mizo chu sawi loh khawvêla mihring tam ber dawttu ram India chhûl chhuak paw’na kan la tih ve theih miah loh chu ram zîmtê, mihring awm zât pawh India rama State pakhat Gujarat-a mihring awm zât (60,439,692) pawh zât lo, mihring vaibelchhe nga awrh (51,269,185) awmna ram, South Korea-a piang leh sei lianten an ti thei bîk tlat. An hla thar leh album tih chhuah hmangten ram an la duai duai mai a; Billboard chart lamah lah record an siam ãwl lo a; an thîkawm ngawt mai. Kan tû leh fa te, kan nulate chenin an zûnah an uai a, kan thîk rawn luai luai mai a nih hi!
Nimin (September 1) kha an member pakhat Joongkook-a piancham, a kum 24-na a ni âwm a. Khawvêl ram hrang hranga an fans, ARMY (BTS fans sawina)-ten an theih ang angin an awmna hmunah ṭheuh an lo lâwm ve a, thil tih âwm loh a nihna pawh ka hre hran lêm lo. Mizoram khawpui Aizâwla ARMY lamho pawh an bãng chuang bîk lo a, Millennium Centre bangah Jungkook-a thlalâk lianpui an zâr hluai mai a, social media lamah te kan lo sawisêl ta luai luai mai a ni âwm a… Eng nge kan sawisêla a titute kha kan lo dem viauna chhan ni ang aw, ka lo ti deuh a. Mi’n an rilru hlimna, an nuam tih ve zâwng an ti ni maiah ka lo ngai a.
Hemi zân hian Facebook lamah movie hmanga lockdown khawvhar min hnêma ṭhintu, ṭhianpa Tommy-a’n ka ziah ni âwm tak (a khaih khaih!) thu a rawn ziak a. Miin football club a ṭan a, fan club te kan lo indin ve a; rock band kan ngaisang a, tribute concert te kan lo buatsaih a, ‘Eng nge a hlâwkna? E le, a nuam maw le!’ tiin a rawn tlângau a, ka pawmzâwng hi a a’n ni êm êm mai khawp a!
A nih leh vawiina BTS ngaisâng lotute (keimah tiamin) hian kan hun laiin Backstreet Boys leh Boyzone te, Cindy Lauper emaw Britney Spears emaw te kan duh lo ngai bîk em ni? Pantera emaw Metallica emaw, Iron Maiden te, G n' R leh AC/DC te pawh? Greenbag-a kan band ngaih sân hming kan ziah ràn nasat theihzia te kha… Kan hunlai milin kan ngaih sânna kan tih lan dân a dang ni ta maiah ka ngai a, kei chuan ka lo hre thiam khawp mai a…
Jimmie Rodgers aṭanga Bob Dylan thlenga tuipuia hla hlui khâwm chîng ka ni a. Ka ti ṭhin a: ka chhûngte tan khan ka hla ngaihthlâk ṭhin kha a va han ninawm âwm ṭhin tak! Bob Dylan-a’n a hla chuam, ‘Knockin' on Heavens Door’ live-a a sak ngat te phei kha chu, mihring zai pawh hi a ang hlawl lo alâwm! Min sawisêlsak chânga ka lâknatpui ve ṭhinzia te kha! Mahse, khatia hla hlui lâk khâwma ngaihthlâk kha nuam ka ti a, ka hlimpui tlat!
A nih, ṭhenkhatin Manchester United kan âtchilh laia kan nauten BTS emaw Blackpink emaw an buaipui avânga ka lo buai ve chiam hian eng nge ka tân hlâwkna a neih chuan le? Ka hriat sual loh chuan kum 2013–2015 chhûng khan kum tin Freddy Mercury ngaisângtuten amah hriat reng nân Freddy For A Day concert an buatsaih ṭhin a, ka tel ve deuh ziah. Kan sawisèl ngai miah loh kha maw le… Vawiina rimawi khawvêla lal lênna lêng mêk BTS member Joongkook-a pianchama Millennium Centre banga a thlalâk an lo zàr ve avânga lo ân chiam emaw, an mahni deuna ṭawngkam lo chhâk chhuah chiam hi a ṭûl ber em le, ka ti. Tommy-a sawi ang deuhin, ‘A nuam alâwm le…’ an ti a ni ve mai a, an hlimpui a ni ve mai a…
Khawvêla kan zawn ber chu hlim hi a ni lo’m ni? Ngawi renga natna hluar mêk, rilru lam natna (depression)-in a ngeih êm êm chu hlimpuia tleipui tûr neih te, nuam tih zâwng tih tûr neih te hi a ni dâwn lo’m ni? Joongkook-a thlalâk zârho kha an depressed-in ka ring miah lo mai! Inhre thiam tlâng zêl ila nun ho a nuam mai zêl ngai e; ram hnuk khawih thil pawi te a nih ngawt loh chuan.
Anni khûm zo Mizo mipa ngaihsân tûr awm ve ni ila chuan ka ngaih dân erawh a dang daih ang.
Zirsangkima