Ka hlauhthawn ruk
Thil sawi chhuah chakawm lo tak mai, amaherawhchu tun hmaa kan thil lo tawn tawh aṭanga ka hlauhthawn ruk deuh mai hi a sawi chhuaktu mawl berah ka han ṭang dawn a nia, ṭhenkhat chuan in lo vei em em in sawi chhuak ngam loh pawh a nih ka ring tho a, MZP buai hmasak hre phak tan chuan ngaihtuah tur hi a tam a ni.
MZP boruak kal zelah Pachhunga College library hal leh bus nam lum tih velte pawh kan lo hre tawh ṭhin a, an hruaitu ṭhenkhatte kha chu sorkar thu zawm duh lova a hranpaa Independence Day te pawh lo lawm ngat tawh an ni a, jail tang tawh leh vuak tuar tawh pawh an awm fur a, Mizorama teargas hman hmasak ber pawh hi ka hriat sual loh chuan MZP movement hnam dang BSc (Agri) zir tur vanga buaina chhuak hnawh darhna tur kha a ni tain ka hria a, Kabir Bedi fanu MBBS zir tura thlan buainate pawh kha kum 40 chung lam chuan kan la hre viau awm e.
Zirlai pawl hruaitu reng reng hi chuan 'tum' hi an nei ran ṭhin a, hei vang taka an zir tawh loh hnua zirlai pawl hruai duh hi an ni. An hnathawh hi a chhuanawm ṭhin a, hnam thilah chuan pawl dang an ngawih ṭhup pawha huaisen taka ke pen mai ṭhin an ni a, tun hmate kan thlir phei chuan buaina pawh an lo tawng fo tawh a ni.
Tichuan, zirlai pawl movement history hi thlir ta ila, tuna kan MLA 50% deuhthaw hi zirlai hruaitu lo ni tawh an ni a, zirlai pawl hruaitute hian a tawpa tawpah chuan politician nih hi an lo tum deuh fur a ni. Tun hnaia zirlai pawl pahnih kan neiha an hruaitute hi chhui kir ta ila, hla tak kan chhui lo a nih pawhin tun hnai kum 10 chhunga zirlai pawl OB chin chu tunah chuan 'politician' an ni sup sup tawh.
Tuna 'hnam movement' tia kan phur em em lai hian tute emaw political career hi kan vulh lian mai mai a ni palh ang tih ka hlauthawng ru tlat a, a chhan chu tun aia nasa hian zirlai pawl hi kan lo thlawp tawh a, hmana zirlai pawl movement-a hnam thila kan mi huaisen leh chhuanvawrte kha political party-ah an lut diak a, MLA leh minister hialte pawh an ni a, an party tana ṭha lo turah chuan an ngawi hmiah mai a nih hi.
Tuna zirlai pawl hruaitute pawh hian ramri chinfel chiah loh Mizoram hmun dangah a awm tih hi an hre loa ni bik lova, hmun dangte ngaihthah a, MLA inthlan dawn kum taka khulaia mi kher, Bairabi All NGO meeting-in, "Sak tawh loh ni se," an tih hnu lawka an han nawr lui leh pawh hi nakin deuha political party-a zirlai hruaitu rau raua hming langsar deuha an luhna tur kawng sialna mai a nih chuan, keini experience lo nei tawh chuan mak kan ti hauh lo ang. Hetiang thilte hi sawi chhuah hun lo a nih pawhin a hun lova thil sawi châk tlat ṭhangthar zinga mi angah min ngai mai teh u.
LR Hnamte, Chanmari West