Romei leh Feel

Ṭhangtharte ṭhang harh ang u ti ringawt i la, duh dan thuhmun lo deuh hlirin boruak kan hip ṭhap ṭhap si a. Mizote hian hla hi kan ngaina a, kan lawm, kan hlim, kan lungngaih leh khawhar ṭawmpui leh tuarpuitu chu hla hi a ni.

Hmanlai hla leh tunlai hlate hi poetry lama tui lem lote pawhin a hranzia an hre ve tlat. Ni e, a dang­lam a, a dal tawh ka ti.

Hlarua hman ngei ngei tur tih dan a awm lo. Chu dan awm lo chu kan zawm ta mah mah, kan pawm ta mah mah a ang. Ṭawng tualleng hmanga hla phuah mawi deuh a awm. Ṭawng tualleng hmanga hla phuah hul leh lem deuh a awm bawk; a phuahtua zir a va ni em. Kan ni tin ṭawng hmante hla thua kan seng luh thiam chuan, a ngaithlatu hian an ‘feel’ bik. A chhan chu ṭhangtharte’n hlarua an hre uchuak tawh lo.

PS Chawngthu­te’na “Chhingkhual Lenmawi” an tih hunlai khan awm ve lo mah ila, hla hlui leh hla phuah thiam hranghluite ka ngainat vang hrim hrimin tun hunah hian khang hunlai kha ka ngai ṭhin. An hla thu kha thui eltiang ni bik lo mahsela, thawnthu sei tak min hrilh.

Tunlai hla ṭhen­khat hi chuan, nula pakhat chhiat lohzia leh neih ngam a nih loh thu phuahin, chu chu kan sa kan sa ringawt. Hranghlui hlate sawi kur duah ila, duhtawk ka ngah hnuah tunlai hlate chip chhunzawm mawlh mawlh thei ila chuan, Lallianmawia Pachuau vanglai pel rawkin ka ziak ngei ang.

Hmanlai leh tunlai a inang lo tia hnial hrep theih ka ni. Hmanlai hun dawn kir chuan hla phuah a awl hmel ngawt mai. Hmun reh leh nuam, sava leh romei te’na lung an tih len tlat chuan.

Tunlaiah hmun reh taka awm tur chuan khawi lai emaw pan vang vang a ngai. Hla phuah tir theitu (inspiration) kan nei chaurau ve bawk. Tin, sava hram aiah ri thei alei a tam bawk. Kan tunlai hlate hi lunglen vang ni lovin lungawi loh vanga phuah a ang ka ti.

Hmanlai chuan:
“Ka lam hawia i seih hianin,
ka tan khuavel a par leh ṭhin.”
Tunlai chuan,
“I nuih zawnga i ha ṭo thuah lang ṭhinte’n…”

Literature-ah poetry a upa ber a; Mizo zingah poetry dinhmun a hniam ber. A satu tur an awm chhung chuan hla hi phuah zel ni se. Hlarua hlui hlawn lova chhawmnung tel ni bawk se. Ṭawng tualleng hla thua seng lut thiam nih tumin inzir zel bawk ila.

Hawh u, tlang bawm romei zing riai saw ‘feel’ chungin hla phuah tum ila, phone bih ngur ngura suang­tuahna ziak chhuak ta mai ṭhin lovin.

Loretta Khawlhring