BENGNGAWNGTE HI...

In chhungkua-ah emaw i ṭhian/ ṭhenawmah beng­ngawng an awm em? Bengngawnna hi piansualna tiin Mizote chuan kan sawi mai ṭhin.  

Hetiang mi an lo awm hian Mizoten ‘mi ang lo’ kan tih anga en mai loh tur a ni. 

Endawng, hmuh­sit, hnuaichhiah, biak chhawhchhi tur an ni lo; an tih theih zawng a danglam a ni. Persons With Disability Act, 2016  phei chuan pian­phunga rual­ban­lote hi a ngai­hluin an chanvo (right) a humhalh ṭha hle. 

Heng mite hi an harsatna neih dan hrethiam a, chumi mila kan enkawl a, kan puih thiam chuan harsatna tam tak kan pumpelh thei ang. 

Bengngawng ten ri hriatna kawngah harsatna an neih avangin mi ti ti haw lam leh kal lam an hre fuh lo fo a, fiah taka hrilha an awih a, pawm a, an zawm mai tur tam tak hi an pawmin an zawm thei lo ṭhin. 

Dawh thei leh hmangaih taka thil kan zirttir a, kan hrilh­fiah ṭhin a ngai. 

Pian tirh aṭanga bengngawng te hi a tlangpuiin an ṭawng thei lo bawk ṭhin. A chhan chu ri an hriat miau loh vang a ni. Mi ṭawng dan hre turin ri an hre tlat lo va, ṭawng an zir thei lo a ni. 

Zaizira biak (sign language) thiam hi a ṭha khawp mai. Tual chher leh mah­ni duhdan ang anga biak aiin mitin hman dan inang tlanga biak theih a ṭha. 

Mumal taka zaizira biak zirna atan leh ziak leh chhiar an zir vena atan (a bikin nau­pang), Ephatha Special School, Vai­vakawn,  Aizawl-ah din a ni ve tawh a. He School hi an ni ang fa nei nu leh pate ṭangrualin an din a ni. Tunah hian Class I - VII thleng hawn phawt a ni.

Bengngawng ṭawngthei lote hi engmah ti thei lo leh chawm hlawm tura ngaih mai tur an ni lo. Bengvar ṭha pangngaia piangte pawh nasa taka thil zir kan ngai vek mai. Beng ṭha lo chung pawha tih theih leh thawh theih a tam. Kut themthiam, in chhung chet, ei siam leh thil dangahte pawh an ṭangkai em em thei a ni. 

Pian hlim aṭanga bengngawngte hi enkawl an ngai nasa leh zual a, mahni zawn ṭheuhah tih tur kan nei a ni. 

Piansualna hi tu chungah pawh thleng thei a ni. Chu­vangin, anniho tan hian ṭanpuitu leh kawhhmuhtu nih tum ṭheuh ang u.