CM Pu Zorama lemziak kha...

Kumin Chapchar Kut vuakveta thil langsar tak pakhat chu, MNF party worker hoin Chapchar Kut Art Exhibition-a lemziak pho lan zinga pakhat, Chief Minister Pu Zoramthanga lem an lak bosak daih chung­chang kha a ni. A la botute lam thlirna aṭangin tih âwm tak a ni mai thei a, mi dang zawng thlirna aṭang erawh chuan, tih âwm loh tak leh inlulinzia lantirnaa ngaih theih a ni thung ang.

 

Pu Zoramthanga hi vawi tam tak a thlalak siam danglam sakte leh amah diriamna video te an siam sak a, a khinlet uai uai ka la hre lova, pa thin nel tak leh hetiang mai mai chu dawl zo tak a ni. Amah Pu Rama hi chuan huat ena a en ka ring lova, a chhan chu hei aia nasa hian an lo bei fo tawh a ni. Pu Lal Thanhawla leh Pu Lalduhoma te pawh hi vawi tam tak an nih lohna anga lang hial khawpin deusawh takin an lem ziak, an video siam chawp hmanga beih an ni tawha an ngawi thei khawp mai, kan politician mature tawh hi chu an lo entawn tlak riau zel a ni.

MNF party worker-te chêt danah khan MNF Ṭhalaite chuan press release siam zuiin, an pu ber Pu Zoramthanga chungchangah a dik loa mipui hruai kawi theihnaa an ngaih thu an tarlang a. A hnu lawkah Congress Ṭhalaite'n press release siam ve lehin, MNF Ṭhalaite thil tih dan chu MNF President tihmualphonaah an ngai thung. 

MNF worker-te chet dan kha India Constitution-a Freedom of Speech and Expression khawih thei hial a ni a, press mite leh artist-te'n zalenna an neih tiderthawngtu a ni. Press mite leh artist-te hian Indian Constitution Article 19 hnuaiah an ngaihdan tarlan theihna zalenna an nei a, chutih rualin, dik lo taka mi beihna atana hman erawh a dik hauh lo.

Chanchinbu hrang hrang­ah, article-ah, press release-ahte leh cartoon hmangtein ngaihdan sawi chhuah a ni fo a, chu'ngte chu chanchinbuahte leh social media-ahte vawi tam kan hmu tawh. Chungte chu Mizoramah hian tharum hmang leh thil inchhuhsak zawnga beih letna kan la hre ngai lo. Lemziak hmanga ngaihdan tarlan pawh eng nge huat viau bikna tur awm?

Art Exhibition-a CM Pu Zoramthanga lemziak kha an ngaimawh a, awm lo se an duh a nih chuan, lei se, la sawn daih se sawi zui tur a awm lo ang. Chutianga ti ta lo chuan, tharum hmachhuanin an chhuhsak a, a lâr phah ta zek a, mi tam takin an hmuh phah ta zawk a ni. Chhuhsak loin, a awm ngaiin awm mai mai se, a hnua a hmutu zinga 80% vel hi chuan kan hmu kher awm lo e.

Tin, MNF worker-te chêt dan hrim hrim kha thil mawi tak a ni lo a; opposition an nih lai ni ta se, khatiang khan an tih ka ring lo khawp mai. 'Kan sawrkar lai a ni a, kan dik emaw, dik lo emaw, kan duh duh kan ti thei. Min khinglet ngam tak tak an awm chuang lo. Min khinglet ngam pawh awm se, engmah tak tak a ni dawn lo, police-te pawhin min man dawn lo,' tihna rilru nei rân chunga chhuhsak an ang ber hial awm e. Ni e, khinglet pawh ni se, police-ah FIR lut pawh ni se, mi lemziak chhuhsaktute kha police-in an man ka ring miah lo - he kan Kristian ramah hian.

Hetiang thil, sawrkar lai nih vanga inlulinna ang chi hi Congress hun lai pawhin kan hmu ṭhin a, thleng tawh lo se a va lawmawm dawn em.

Art Exhibition khan IPR Department leh Mizoram Art Development Society-te buatsaih a nih hmel a. A buatsaihtu MADS-in MNF worker-te chetna an dodal lo kha a demawm hle. An dodal ngam lo em ni? An member, artist kha a thlavâng an hauh tura kan lo ngaih laiin, thlavang hauh chu sawi loh, a thiam lo tiin an pawm ni awm tak leh dah 'offside' rânin thupha chawina press release an la siam zui mai a, MADS ṭhukhawmin anmahni thutluknaa an siam nge tihtirtu a awm zawk tih hi Kanan Veng lama tu emaw zawk zawk zawh chi a nih hmel khawp mai?