PWD Minister banna chhan tur

February, 2018-a Tuirini lei a chim avangin MNF-te'n PWD Minister bang turin an phut a nih kha. Lei chim hi thil ho takah ka ngai hauh lo a, chutihrual erawh chuan PWD Minister bang tura nawrna awm zawk tih kei chuan ka nei.

Vanglaini Feb­ruary 14 chhuaka Mal­sawmdawngliana article ziah kha ka thlawp zawng tak a ni. Malsawmdawngliana sawi ang khan Mizo­ramin chakkhai kan lakluhna kawng pawi­mawh ber leh kan airport neih chhun panna kawng tun thlenga siamṭhat a la nih loh avang hian PWD Minister hi bang tura nawrna awm zawkah ka ngai.

Hunthar veng lei tla­hniam avang leh Rang­vamual leimin avangin kum tin Mizoramin harsatna kan tawk a, kawngpui a chhe lutuk, lirthei a kal hleithei lo. Kawng pawimawh vawiin thlenga siamṭhat theih a ni lo hi chu PWD Minister tan chuan mut mawh hnar mawhah neih tham a ni; helai kawng tawite siam ṭha thei lo PWD Minister nih hi zahna tham a ni.

Lei a chim a, PWD Minister bang tura phut a ni. Lei chimah hian PWD Minister hian mawhphurhna chin chu a nei ang, a tak takah chuan hnathawktu engineer-te mawhphurtu berah kei chuan ka ngai. Kan chakkhai lakluhna kawng siamṭhat tun thlenga a la nih loh chhanah erawh PWD Minister hian 100%-in mawh a phur.

PWD Minister hian engineer rual a ngam lo nge, engineer rualte hi PWD Minister hi an bum zawk? Helai kawng pawimawh tak siamṭhat theih a nih loh chhan hi sorkar hian mipui hriatah chiang taka an puanzar a hunin ka hria, harsatna a thlen hnua in sawifiah chung ringawt hi chuan mipui min hmin zo tawh lo.

Hunthar lei tlahniam leh Rangvamual kawng chhe ṭhin hi a tawi em em a, siam har deuh pawh nise kawng thui tham a nih loh avangin sorkar hian a duh chuan a siam theiah ka ngai. Sorkar hian a duhnaah chuan sum a nei lutuk tlat. Sum sen tam deuh a ngai a nih pawhin kan chakkhai lakluhna kawngah hi chuan sorkar hian sum ren lo se, mipuiin pawhin kan demin ka ring hauh lo.

Furpui a hnai a, Hunthar leh Rangva­mual helna awm chhun Sakawrtuichhun lam lah siamṭhat mumal a la ni si lo. Mipuiin harsatna nasa zawk kan tawh leh hma ngei hian kan kawng pawimawh siam ṭha tur hian PWD hian chhun zan zawma hna an thawh a hun a, a kaihhnawih department dang an awm a nih pawhin phungbawmah sawm rawh se.

Harsatna tawh hun­ah khaw chhe hnuaiah harsa taka siam tum leh ngawt ṭhin hi chu a dik lo, tunah siam theih a nih lai ngei hian siam rawh se. Lei chim ngaihven em emtu eptu party lam pawh hian kan kawng pawimawh ber siamṭhat a nih theihna atan hian sorkar an nawr awm thawm ka hre hauh lo. Fur nise mipuiin harsatna tawkin, sorkar demna atan hmanna atan an duh em ni?

Lalropara