Sorkar laipui zirtir tih hi

Hmunpui rama Model Bamboo Plan­tation hmuna raw ching turte hnena Lengpui community hall-a ṭanpuina sem a nih khan khuallian Chief Minister Pu Zoramthanga khan SEDP chu NLUP ang a nih loh thu a sawi a. Chief Minister sawi danin, raw project kalpui tura an buaina chu pawisa petu tur ber sorkar laipui zirtir chawp an ngaih vang leh a chi duh ang neih theih a nih loh vang a ni. 

Tuna raw chi siam­tute chuan an siam chhuah dan chu midangin an hriat ve chuan an business a hlawk loh an hlau a, midang an hrilh duh lo a ni. Thla tin a ṭiak 10,000 vel an siam thei a, an laboratory tih len a, a aia tam siam chhuah theih an tum a ni. Nikum aṭangin chah ṭan chauh a ni bawk si a, an siam chhuak tam thei bawk si lo a, chuvangin a chi duh anga tam hmuh theih a ni lo. 

Khi thu khi chan­chinbu lama ka lo hmuh ka rawn khar chhawn a ni a, in chhiar ve pawh ka ring a, kan ram innghahna leh dinchhuahna tur bera kan ngaih raw project lama Central lam zirtir chawp an la ngai hi a buaithlak ngawtin ka ring a. Pawisa kan dil duh bawk si a, pawisa petu tur ber kha kan zirtir chawp an la ngai bawk si a, chuvangin hre lo chunga raw project atana pawisa pek chhuah chu sorkar laipui tan pawh a buaithlak hian ka ring ve tho bawk a, hei aia chiang zawk dinchhuahna tur project dang rawtna atan pawh a la tlai lo asin mawle. 

Sorkar laipui hian raw project hi an rawn tuipui ve theihna tura kan zirtir hiam hunah an rawn che dawn a nih chuan hun hi a liam zel ang tih a hlauhawm a, tun MNF term-ah hi chuan raw hmang hian kan intodelh hman lovang tih pawh a hlauhawm ṭan rum rum tawh. 

Kan Chief Minis­ter hian ropuina deuh a nei - a seh tawh chu a seh ngat ngat mai ṭhin hi a ni. An term hmasa khan a chakpui zo ta lo mai pawha mau kha a buaipuiin a sawi nasa, tunah pawh mau ang deuh tho rua a sawi nasa leh a, a buaipui leh a, Horticulture Department a han chang chat bawk a. Mizoram aṭangin Central lam an zirtir thiam chhoh hman phei chuan raw pro­ject hi a champion pui thei ang tih chu a rinawm tho bawk si. 

State khat Chief Minister-in vawi tam tak a sawi tawh a atchilh tlat chu a tihlawhtling ṭhin a, kan state pawhin rua hmanga intodelh hun hi kan nei ngei ang tih i ring phawt ang u. Sorkar laipui pawh hi zirtir chawp an ni chungin mithiam rual an ni a, an zir thiam thuai turah i ngai tel bawk ang u khai.