MNF an puhna hian belhchian a dawl lo

Mizorama ruling party ni mek MNF chu ṭhuang hniha kal, rei lo te phel thei mai dinhmuna ding tiin vawi hnih lai thehdarh a ni tawh. A hmasa zawk chu MNF term tira Vice President pahnih an paih hlim khan a ni.

A vawi hnihna chu kum 2020-a COVID a len tirha Health Department sum hman dan an audit hlim khan Mizoramah social media hmangin mi tuten emaw an thehdarh chiam mai a, thu ziak an thiamin an sawi dik hmel tehlul nen tun thlengin MNF party chu a nghet tawlh tawlh zawk a ni.

Politics-ah hian mahni lam ṭhatna hi sawi ta mai ila khaw khata political party hrang hranga awm te pawh hi kan inhal vak lo tur hi a ni a, mahsela mi ṭhenkhat hi chuan anmahni party fak mai chu duhtawk lovin midang party beihna atan dawt thu phuahchawp ngialngan pawh an vawrh darh hreh lo tlat mai hi Mizorama party behchhana mi kan inhal chhan hi a niin ka hre ve ṭhin.

Party hruaitu lian chin hi chu Assembly House lama na taka an inbeih hnu lawk hian a lang lo lamah chuan chhun thingpuite an in ho leh ṭhap ṭhap ṭhin an ni a, kei ni ak zathnih hnuai lam contract nuai 5 hnuai lam lo beisei ve bawk ṭhintute hi a mawl pawlah kan lo ṭang leh ṭhin.

MNF party an beihna Pu Tlanghmingthanga leh Dr R Lalthangliana Vice President aṭanga an paih kha inthlana thilhtih pawh ni lovin President in ama power-in a paih tawp a. Pu Zoramthanga hian Dr Thangtea hmasawn zel tur hi duh lovin a paih a, Pu Tlanga pawh senior a ni chungin a paih tawp mai a ni.

MNF party chhungril hi nasa takin a khi, tiin thu an thehdarh vel kha a ni a, mahsela thil a kal zel danah hian Pu Tlanga leh Dr Thangtea hian a vuivai zawngin an la lova, party hruaitu inthlak kual a hun tawh vanga inthlak ve mai mai a ni tiin MNF aṭanga chhuah tumna an nei lova, MNF party a khi titute hi chu MNF party chak tak hi khi se ti em emtu opposition lam zawk a ni daih ang.

COVID a len tirh leh hri avanga kan buai em em laiin CM leh Finance Minister Pu Zorama hma­laknain amah hnaih theitu Dr Thangtea mualphona turin Health Department chu an audit tir a, hei hi Health Minister tih mualpho hrim hrim tumna a ni. Hri do lai laia audit an tih chhan hi MNF hruaitute Vice President aṭanga inpaih hnua lungawi lohna kal zel tiin an sawi daih leh bawk a ni.

He thil pawh hi a hmaa kan sawi tak ang bawkin belhchian dawl lo leh innghahna engmah awm lo a ni a, opposition zawkin thiam taka MNF karah boruak siam an tumna a ni.

Hetiang chi politics game ṭhing takah hian MNF chu an âwk duh lova, opposition thangkam chu a per ṭhelh a, MNF party chu hri leng karah pawh hming chhiatna nei lovin chak taka kal mekin ramri chungchangah phei chuan mi zawng zawng fak turin an invawrh sang zual zel zawk a lo ni.

K Lalmuanawma