BUHFAI INCHUH BORUAK HI

Coronavirus hri lêng kaihhnawiha Aizawl khawpuia buhfai leh thil dang inchhêk khâwl chiam chiam (panic buying) chungchâng hian sawi a hlawh hle a. Mizote kan chiai hma lutuk tih te, kan Kristiannaah kan pawnlâng lutuk tih te, kan duhâmin mahni hma kan sial lutuk tih te a ri ring hle. He'ng hi a dik viau pawhin a lang rêng a ni. 

Hetiang deuh, khawvêl hmun hrang hranga thleng ṭhin chu 'bank run' an tih hi a ni âwm e. Miten sum an dahna bank kha tla chhe dâwn emaw, tâwp mai dâwn emawa an hriat chuan (thuthang dik lo mai mai pawh ni se) an sum dah kha an chân mai ang tih hlauvin an la chhuak ta ruih ruih ṭhin a. 

Chutiang thil a thlen tawh chuan bank tla chhe lo tur pui pawh khân a tlâk chhiat phah thei a ni (pawisa an lâk chhuah vek chuan bank a kal zêl thei lo). 

Hetiang a nih avâng hian bank-in harsatna a tawh chângin 'run' a thlen thut loh nân hmalâkna mumal tak a awm a ngai a ni. Tun hnaiah Yes Bank chu hotute eirûkna avângin tla chhe mai dâwn angin a lang a. Chhiatnain chhiat zakhuana a thlen loh nân RBI a inrawlh vat a, Yes Bank aṭanga pawisa lâk chhuah theih zât a rawn bituk ta vat a ni. 

Chutiang deuh chuan ei chawp ma­mawh thil kha miten an lei ruih ruih chuan lei tur a awm loh mai hlauhna avângin lei ve sawk sawk a ngai thei. Hetah tak hian mipui nunphung thununtu fel tak a awm a ngai ṭhin. 

Khawtlânga harsatna engemaw tak a lo thlen chânga zirtirna leh kaih­hruaina mumal min pe thei leh min thla­muan thei sorkâr fel leh viak ṭha kan mamawh ṭhin a ni. 

Sorkar chauh lo pawh, tlâwmngai pâwl leh kohhrante pawhin mipui thla­muan leh zirna pek hi kan tih tûr pawimawh tak a ni ang. Mimal ang pawhin, a fing fel deuhte hi chuan a mâwl zâwkte mang­ang leh chi-ai hi diriam ringawt lova kaihhruai zâwk a pawimawh hle. 

Sumdâwng mite pawhin kan hlâwkna ringawt thlîr bîk loh hun hi a awm ve tûr a ni ang. Delhi-a kan vêng bul lawkah hian ṭhian pakhat chuan hmai tuamna lei deuh ṭeuh a tum a. Dâwrkai pa chuan, "Mi dang pawhin an mamawh ve a, lei ṭeuh bîk ka phal lo," a lo ti mai. 

A thil zawrh kha mi pakhatin rawn lei zo vek sela, a tân chuan hlâwkna a ni mai. Nimahsela hetiang mipui mang­an­na hunah hi chuan he ring lo mi hi chuan ama awlsamna leh hlâwkna piah lam deuh a thlîr phâk a ni.