ZIR SAN NGE LEHKHA THIAM?

A KAMKEUNA
Hnam naupang te e ti lovin Mizote hi zirna lamah kan ṭhang duang hle. Khawpui leh thingtlang lama chengte pawh hriat hran harsa khawpin kan hawiher a inrualkhai a, a lawmawm hle. Mipui mimir pawh phai ram state tam taka chengte ai chuan kan changkang vek zawk niin a ngaih theih.

Sikul kai rual, kai lova tal mai mai kan vang hle. Tribal kephah hlai zinga chhiar tel ve ni mah ila kan theuneu lem lo. Mahse, kan in enfiah a ngai hle; chuvangin, zir san nge lehkha thiam tih hi engnge a danglamna i lo thlir zau teh ang:

ZIR SAN
Mi a taimak phawt chuan a tum tawk zelah zirna rahka (degree) sang tak thleng a rap thei. Tih ṭhat tum êm êm lem lo, mi rahka rah thlen ang rah tum ve hrim hrim avang emaw, degree sang neih ve hrim hrim tumna avanga zir san pawh a awm thei awm e. Thiam nãl (expert) tak takna neih tum lem lova zir san ve hrim hrim tumna pawh thil awm thei a ni. Chutiang zirna chu zir san hian a huam thei awm e.

Mahse, a thiamna chu chhawrnah­awm tak a ni lem lo thei. Mahse, a tum ram thleng theia a zir sang thei hrim hrim erawh a fakawn. Hnual­suat ringawt chi chu a ni lo. Matric Appeared But Failed (MABF) pha lo pawh tam tak an awm tlat.

LEHKHA THIAM
Lehkhathiam tih hian mi a zirlai mil zela pakhatna hauh zat zat lam a kawk lova, a zirlai mil zela thiam nãlna (efficiency) nei tak tak khawpa zir chhuah hi lehkha zir thiam chu a ni. Zirna rahka a rah chin chu a hniam emaw a sang emaw pawh ni se a rahka mil zelin a thiam nãl (expert)-in quality a nei ṭha tawk ṭhin a ni. Chutianga zir thiam tak tak chu lehkha thiam chu a ni.

Tuna kan engineer, MCS; Ph.D, doctor, college/ university professor, scientist, IAS etc. mithiam tak takte hi lehkhathiamte chu an ni. Heng zinga kan mithiam hranghlui state khat Chief Secretary (Mizoram) lo ni thei khawpa lehkha thiamte chu kan entawn atan tarlang laawk ila.

1. Pu Lalkhama

2. Pu P. Rohmingthanga

3. Pu M. Lalmanzuala

4. Pu F. Pahnuna

5. Pu Lalfakzuala

6. Pu H.V. Lalringa

7. Pu Haukhum Hauzel

8. Pu Vanhela Pachuau

9. Pi L. Tochhawng

10. Lalmalsawma

11. Lalnunmawia Chuaungo

An van fakawm tehlul em! Heng kan mithiamte hian an zirlaiin hrehawm tam tak paltlangin thiamna hi an sual chhuak a, an hna pawh nãl leh hnehsawh (expert) takin an thawk tluan thak thei a; ṭhangtharte hian kan entawn atan a van ṭha em! Ramri pel lova Zoram chhung chauha sorkar hna hmuh tumsa rana lehkha zir kan tam ber em ni? Inngaihtuah chian a ngai hle.

A TLANGKAWMNA
Ziak leh chhiar thiam tehna literacy percentage-ah chuan tunhma aṭangin India ram pum huapah Mizoram chu 1-3 naah kan lang pha chho zat zat a, kan inchhuan phah hle ṭhin. Mahse, tunah chuan 3na pawh kan ni pha meuh tawh lo. Tin, literacy percentage hi lehkha thiam tehna ni lovin ziak leh chhiar thiam hrim hrim tam zawng tehna a ni. Hei hi hre hrang lovin mi tam takin "Mizoram chu lehkha thiam tamna ber kan ni" kan ti ve leh piap mai ṭhin, hei hi ngaihdan dik lo tak a ni. Ziak leh chhiar satliah thiam hrim hrim kan tam tihna mai a ni e.

A nihna takah chuan Mizo zingah hian lehkha zir sang chu kan tam tawh hle a; mahse, lehkha thiam tak tak mahni zirna rahka (degree) mila thiam nãl (expert /efficience/ quality) nei erawh kan la tlem hle niin a lang.

Kum 2017 CCS (IAS) Final Result tihchhuah takah khan North East aṭangin Assam; Manipur leh Arunachal aṭangin IAS tling an awm nual. Mizoram, Nagaland, Meghalaya & Tripura aṭangin tumah an lang lo. Kum 2015 survey aṭanga a lan danin Tripura hian Kerala rawn khumin literacy percentage-ah India ram pumah 1na an ni a, Mizoram chu 3na kan ni. Literacy percentage aṭanga thlir chuan a bik takin Tripura & Mizoram chu IAS tling thar ngah ber ber state ni awm tak kan ni. Mahse, literacy percentage pawha langsar lem lo, Telengana state ami chu pakhatnaah a lang nalh mai a nih kha!

North East-ah pawh a bikin Mizoramin ṭan kan lak a ngai hle. Tun dinhmunah IAS exam paltlanga tling service lai kan nei tlem tawh hle. MCS senior aṭanga hlan kai conferred bak chhuan tur kan nei ta meuh lo.

Chuvangin, Mizo lanu valrual zirlaite'n theihtawp chhuaha tan an lak thar a va hun ta em! Mi fa, hnamdangte pawh IAS-a an inziah tlin theih chuan Mizo thluak hian a phak ve a ni tih hre reng chunga In puanvente sawi chhinga hma thar la ṭheuh turin inpuahchahna thar nen tihtakzeta beih a hun ta e.

Hnunga kawl ek thai mai lovin, hmatiang sawnin raltiang ram i kai ve ang u.

"Zoram ṭang fan fan,
Zoram tang fan fan,
Hun a liam hma hian"

NB: Article hi keima tawnhriat leh ngaihdan public inerest atana ka ziah a ni e. (See-Article 19(1)(a) of the Constitution of India & CCS rules 8(3)).

Dr. C. Lalrampana