MI HRI THLIR DAN TE PAWH HI HRE VE ILA

Mizo hi kan vannei a, kan la tlem a, awareness hi kan nei ṭha a. Covid 19 pawh hi kan hlau thiam khawp mai. Tripura, Arunachal, etc. velah hi chuan Covid awm ring lo tlat an la tam mai!

Tripura-ah kan awm a, hri hlauhlohna hian min man ve tawh a, symptom nei lo phei chu kan ngai ho khawp mai. Min kai theih hi kan ring miah lo. Symptom nei lo in test te phei chu ṭul kan ti lo khawp mai.

Mizoramah chuan hri kaite hi kan en dan a dang lutuk a, hri hlauhna vang hian a hrikai te pawhin kan nat zual phah deuh ni tlat hian ka hre ve ṭhin. Covid vanga damlo te hi an home quarantine na Inah luh­chilhin ka ṭawngṭai ṭhin. Hri aiin a damlo te thlamuan ṭulna kha ka rilruah a lian fo.

Ka nupui leh a ṭhiannu pawh Rev. Mamuana hovin Covid positive naute Mizo­ram thleng an rawn thlah a, an lo hawng pawh kha kan lo quarantine lo, an hah naklai a, zan 2 tlaivar deuh thaw an ni a, duat takin kan lo dawngsawng mai. Hri chu an kai mai thei, mahse hrikai chu kar hnih hnuah a reh leh mai dawn a, lo in duat theih loh kha ṭha pawh ka ti vak lo. Kan lo test lo va, symptom an nei lo va, keini pawhin kan nei bik lo.

Thla hmasaa Covid vanga thi Missionary kha a pasal a positive bawk a. A death certificate, Mizorama phurh phalna, etc vel buaipui chhung darkar 5 vel kha PPE pawh ha lovin Agartala pastor hian Covid ward-ah ruang a lo kilpui char char a ni. Hri hlauhna ai chuan anmahni a lainatna kha a nasa zawk miau a. Ani pawh kha kan quarantine bik lo, symptom a nei zui lo.

Kar hmasa pawh khan Manu bialtu pastor positive kan building room pakhatah a in quarantine a. Agartala Pastor nupui chaw petu pawh hian a room chhungah vek chaw pein an titi pui bawrh bawrh ṭhin. Phar ang maia pawna chaw ei tur va dah te hi an ti ve tlat lo. Building a cheng chhung­kaw member dang pawh a room-ah kan han leng fo a, missionary pastor Covid rawn tlawhtute pawhin an lenchilh mai zel. Hmai kan tuam a, kan him em em tho mai, kan thinhrik hran lo.

Doctor-te hlei hlei hian an ngam. PPE ha lo te hian GB hospital Covid ward-ah hian an duty mai mai zel. Mizo doctor pawh hian Covid ward ka duty chhungin PPE ka ha ngai lo an ti!

Mizoram ngaihtuah dana ngaihtuah a, nuihzat thlak deuh deuh sawi tur hi a tam mai. Fimkhur lo ni lovin hri hi ngam deuh thei ila aw, symptom nei lo tan phei chuan thil serious a nih loh hi maw! Thingtlang ṭhenkhata Covid phei chu a tu amah symptom neia ram an awm tam lova, Pathian zarah 'hri kai lo' an ni leh thuai ang.

Kan thawktu (a ram mi) fiamthu duh ve tak pawh missionary nula te an inah a tlawh a, thingpui te a in a, a hawn hnuah a positive tih a hrilh a, a khat tawkin in hritlang ve tawh em? tiin a va call zauh zauh a ni awm e. Kan naupan deuh laia mit nâ infiam nana kan hmang a, kan mit tui kan in tat ang vel khan in ngamtlak chu Covid-in an infiam vel mai mai tawh a ni!

Rilru zangkhai taka dawn­sawn thiam chuan a dam leh pawh a chak deuh zawk niin a lang. Hri nena chenho tih pawh hi hri rap lutuk loh hi a ni mai lawm mawni le? A vei hi rap lo ila, a kai pawh hian eng he huah ngai lo ila, symptom kan neih nasat chuan in enkawl thuai ila. A enkawltute pawhin enkawl der der lovin enkawl bawrh bawrh thei ila, dam a sawt zawk ka ring mang e.

Pastor Sairengpuia