Eng tak nge kan kah chhuah?
Mizoram leh Assam ramri buai kan sawi apianga a serh zinga a mei chu, "Kan ramri chu 1875 ramri kha a nia," tih hi a ni. He ramri kan sawi teivet hi Dholai thlang lamah a ni an ti. He ramri hi kan hauh ngam lova, Vairengte dai maia kan Police Out Post meuh pawh Assam hian min rawn chuhpui ngam a, chumite chu kan Police huaisenten an kap ta a ni.
Kan inkah hma leh kan inkah hnua kan ram hauh chin hi a la ngai reng an ti teh fo hi a nihna tak hriat a chakawm a ni.
Kan sorkar hruaitute, kan political party leh NGO pawhin 1875 ramri kan pawm tlang a ni. He ramri chhunga cheng Lailapur lam chuan an duh hun hunah kan kawngpui chu an dang vel mai mai a. Tunge a nih pawh kan chian loh 'Raju-a' ti chauhva kan hmelhriat Lailapur mi chuan a duh hunah a naute fuihpawrhin Mizoram kawngpui a dang thei zel tih hi kan hmu ṭhin.
He Raju-a hi kan ramri chhunga (1875 ramri kan pawm a nih chuan) chhunga mi a ni a, zuk man mai ang u hmiang? Heti reng renga min zah lo Lailapur (kan ram chhunga kan chhal) lawka awm a ni si a.
Kan huaisenna hian kan ram hi feet khat tal pawha a zauh si loh chuan kawngpui block avanga, "Vairam thar chawheh ka ei lovang," tihte leh #ShameonHimanta tih te pawh telin a zuih ral leh mai ang tih a va hlauhawm ta em! Aw Zoram, kan silai puak ruala hnehna chang anga kan inngaih khan 1875 ramri chu zuk hneh chhuh ta law law ila ṭha tur a nih laiin Vairengte daia kan Police Duty Post min chhuhsak chu kan la leta hnehtu auvin kan lo au ta mai zawk em ni le?
Kan ramri buaiah hian ram kan neih zau belh dan hi a hre zawkte khan han ziak teh u khai.
C Vanlalsawma