Traffic jam nasa tih ziaawm a ṭul

Tunlai te hian Ai­zawl khawpui traffic jam nasa lutuk hi engtin nge kan tih ziaawm ang? Heti lutuk hi chu a manganthlak a, traffic enkawltu lam mawhphurhna ni mahse mipui lam pawhin kan hmalak ve theih engemawchen a awm. Traffic jam hian hun a tihhek mai bakah oil thlengin a chuang liamin a kalral nasa hi a uihawm ngawt mai.

Traffic jam nasat chhan pakhat chu Bible House bul lei tlakhniam vang a ni a, tunah hian lei (bridge) dawh mek a ni a; an zawh hma chuan helai kawngah hian lirthei a kal dawn si lo. He kawng chhia hian Aizawl chhim lam lirthei kal vel a tibuai hle a, Kulikawn aṭanga Tennis court thlengin a nghawng nitin ta mai a nih hi.

Pakhat lehah chuan Bawngkawn kawng kual laih zauh hna thawh a nih vang a ni. Helai junction hi hnathawh lai chuan Chaltlang aṭanga Bawngkawn panna kawng chu block a ni a, hei vang hian Bawngkawn lam pan tur leh Bawngkawng aṭanga Aizawl lam pan tur lirthei lam zawk chu Ramhlun kawng lamah an kal deuh vek a, a vanglai chuan Chanmari-Bawngkawn inkar Ramhlun kawng chu chep mep mep tak a ni.

Hmasawnna tur chuan harsatna tam tak paltlang a ngai a, chu chuan rah ṭha tak a chhuah ṭhin. Bawng­kawn kawng, Sairang lam peng an zauh mek pawh hi hmasawnna chikhat, ropui tak a ni. Mahse lirthei chetvel a tibuai hle. Hei hi pumpelh theih dan a awm reng a, mahse mipui lamin kan la thiam loh vang a ni.

Tunhnaiah two wheelers taxi permit an pe nual a, mipui pawn kan chhawr hle a, chhawr tur pawh a ni reng a ni. Taxi intlan chhawk pangngai a la kal reng a, taxi zawng zawng 'A' 'B' 'C' in an ṭhen a, nitin engemaw ber hi a ding a, chuti chung chuan taxi an la tam hle tho mai.

Heng taxi pangngai, two wheelers taxi leh city bus-te hi mipuiin chhawr ṭangkai thiam i la, mahni lirthei kher keng loa vah chhuah tam ching ta ila traffic jam a ziaawm ngei ang. Mahni lirthei kher veivah nana kan hman tam lutuk vangin traffic hi a jam leh zual a, ṭul loah sum kan seng bawk. Sorkarin mipui tana hman tur permit a pek lirthei te ṭangkai zawkin hmang ila, traffic jam a ziaawm ang.

Traffic police-te hi an fakawm khawp mai. Ni sensa hnuaiah leh ruahsur hnuaiah traffic control hna an thawk a, hlawh neia sorkar rawih rau rauah a hah ber zinga mi an ni. Chuvangin, an thu hi awih tlan hram pawh an phu khawp mai.

Lalkhirhvela