Sorkar hnathawk te leh ṭhatna

Mizoram sorkara hna thawk fel tak tak karah anmahni dawrtute laka hawihhawmna nei map lo an va tam em. Officer ṭhenkhat phei chu document min attest sak tur pawhin biak har tak an ni.

High school kan kal laiin Statistical Department office kan dawr a, an pu, an hotu ber hawihhawm leh biak nuam tak kha tun thleng hian ka la theihnghilh thei lo. Kan thil buaipui chu nghah deuh a ngaih dawn tih min hrilh a, thingpui a lam nghal a nih chu!

Kha officer ang deuh vek kha officer nei ta ila sorkar department ṭhenkhata thawktute hawihhawm tawk loh avanga mite sawisel tawk leh zauh ṭhin ho hian sawisel an tawk ngaiin ka ring lo. Department khata an hotu ber a hawihhawm tawh miau chuan a hnuaia mite tan chuan han hawihhawm loh viau ngam a ni dawn tlat lo a ni.

Sorkar hna thawkte hian mi dangte ṭanpuitu kan ni tih inhria ila, ṭhat i chhuah fo ang u. Mipui rawih, mipuite ta kan ni tih te hi sawrkar hna thawkte hian in hriat reng a, nangmahni dawrtute chungah tlawmngaih chhuah a, an harsatna laiah ṭanpui hreh lo hram rawh u.

Nawlchunga Chinjah, Saiha