Ram leh sakhaw himna tur

Spiderman film-ah khan a pu khan a changtupa hnenah, “Chakna a san poh leh mawhphurhna a sang,” an tih kha. Chak zawk lakah kan beiseina a sang zawk a, nihna hian mawhphurhna a keng tel bawk.

Kan rama kawng­pui chhiat chhanah hian kei aiin Chief Minister mawh­phurh­na a sang zawk.

Kan Zoram leh sakhaw himna turah hian mipuite aiin kan politician te leh rorel­tute mawhphurhna hi a sang zawk. Chuvang tak chuan, kan ram hruaitute faksel reng reng hian dum chungu ang maiin kan rak chuah chuah a nih ber hi. Ram leh hnam, sakhuana hmalam hun hi an kutah a awm si a.

Ṭhenawmte aṭanga in en fiah: Kan ṭhenawm Tripura chhanchhuaktu ber pakhat chu Communist pa Manik Sarkar a ni.

Bihar state ṭawp tak tung ding lehtu khu Nitish Kumar a ni. Tripura Chief Minister thar khu Hindu pachal a ni a, BJP a ni bawk. Hmanni khan bial fang a, a kalna kawng a chhe lutuk a, “He kawng hi eng tika siam nge? A siamtu engineer hi tu nge? Kum nga daih pawh kawngpui siam thiam lo hi suspend nghal rawh u. Nakinah inquiry chu kan ti ang,” a ti mai. India ramah Modi-a thlipui a tleh mek. Heng mite hi pathian ban sawm nei hmaa kun ṭhin, BJP te an ni. Hma an sawn lutuk, hma kan sawn ve em?

Hmuh theih chhan­na an duh: Pui­tling Sunday School khaikhawm thei Pu Zo­ramthanga te, Pathian nung rinchhan inti, inkhawm ve ṭhin Pu Hawla te kawngpui siam hian fur khat a tuar chhuak zo si lo. Hnalak ni se, chhungkhat laina hmelhriat nei ṭha lo tan beisei tur a awm ve lo. Eirute an hrem ngam tak tak lo.

Ṭhangthar, hma­sawn ch^ka tuihalte hian Hindu pachalte hmasawnna thlen mek hi an hmu ang a. Kristianna hi eng nge a ṭhat bikna an la rawn ti dawn a, eng nge kan entir ang? Hmuh theih chhanna an la phut dawn.

Kristianna aiah sakhaw dang: Pathian tel lova buai em em ram hruaitu kristiante avang hian kan tu leh fate hian Hindu sakhua aia Kristianna ṭhat bikna min la rawn zawt dawn. ‘Vanram kai nan a ṭha, hremhmun pumpelh nan a ṭha’ tih ringawt hian an rilru a hmin dawn lo. Thil ṭha an duh, a taka lang thei hmasawnna an duh dawn.

Sakhuana aiah hmasawnna: Megha­laya leh Nagaland, Kristian state velah BJP-in thiam takin ram an la duai duai. Eng vang nge? Hmasawnna an duh. Tuna Zoram hruaitute leh sakhaw rawngbawltu kristiante hian ‘a ni hi chu BJP a nia, hlau rawh u.

Hindu a nia, hlau rawh u. Kristian ni mah se a inkhawm ngai lo a nia, kohhran sawisel ching tak a nia’ tiin an khingpuite hi demna an zawng char char ang.

Inkhawm ṭhin Kristian hian hma­sawn­na a thlen theih si loh chuan, eiru a hrem ngam si loh chuan hnawl an la ni dawn tho tho. Hmasawnna thlentu an nih phawt chuan Hindu pa hi hruaitu atan kan sawm lut duh hial tawh ang.

Kan ram hruaitute hian Krstianna ṭhat bikzia hi thil tih nen lantir se la, kan ram leh sakhua pawh humhim a ni ang. Eng kawng emaw zawk zawk hi kan zawh dawn e.

Lalmuanzova Khiangte, Lunglei