HEALTH MINISTER MAWHPHURTUAH AN PUH HI!

Kum 2019 kum tawp lam aṭanga khawchhak lam China aṭanga lo chhuak Covid-19 hripui chuan vawiin thlengin khawvel ram hrang hrang nunphung min la tibuai hneh hle a. Ram ropui ber leh ram hausa ber pawh an ram economy thlengin a tlakchhiat phah ve a ni. Mi tam takin nunna an chan tawh a, Mizoramah pawh mi 224 laiin Covid hrikai kaihhnawih an thihpui tawh a ni.

MPCC Media Department chuan September ni 4 khan Aizawl Press Club-ah thuthar thehdarhtute an kawm a. Health Minister Dr. R.Lalthangliana chu hripui donaah hlawhchhamah puhin, MNF sorkar hlawhchhamnaah an ngai a. Health Minister aṭanga chawl tur leh Health Minister thar ruat tura Chief Minister an ngen thu an tarlang tel bawk.

Covid-19 hi kan hriat ngai loh natna thar a nih avangin, a hri do dan hi a buaithlak bik em em a. Vawiina ṭha tura ngaih hi a karleh lawkah a lo ṭha lo leh a, a aia tha zawk tura ngaih lo chhuakin, chu pawh chu a hnu lawkah a lo ṭha lo leh ṭhin a, khawvel doctor thiamte leh Medical Team-te pawh an lu a tihai ṭhin em em a ni.

MPCC-ten khawvela lock down rei ber ni chungin hrivei kan kiam thei lo an tih hi thlirna tlang khat aṭang chuan a dik teh nameuh mai. He hri hi Mizorama a lo luh hma hret khan Health Minister Dr. R.Lalthangliana kaihhruainain 'State Level Committee on Covid-19' din a ni a. Hripui laka lo invenlawk nan India ramah Airport khar hmasa ber leh Airport-a screening test kalpui hmasa ber kan ni a, Lock down ti hmasa ber ni bawkin state boundary leh international boundary-ah check post siam a, screening test ti hmasa ber kan ni bawk.

He chanchin ziah lai thlenga India hmarchhaka hrivei tawh zat leh thihpui tawh zatte tarlang lawk ila. Assam-ah 591,980 vei tawh awmin thihpui zat 5699; Manipur-ah 115,399 vei tawh awmin thihpui zat 1798; Tripura-ah 83281 vei tawh awmin thipui zat 800; Meghalay-ah 77021 vei tawh awmin thihpui zat 1329; Arunachal Pradesh-ah 53338 vei tawh awmin thihpui zat 264; Nangaland-ah 30356 vei tawh awmin thihpui zat 626; Sikkim-ah 30242 vei tawh awmin thihpui 373 an awm. Vanneihthlak takin Mizoram chu la thihpui tlemna ber, mi 224-in thihpui tawhin vei tawh 64228 kan awm a ni. Keini aia hri kaihhnawiha thihpui tam ṭhiau hmarchhak state danga Opposition party-te hian an Health Minister leh an state sorkar hi mawhphurtuah ngaia an dem thawm kan hre lo, a ram angin an ṭangrual hle zawk a ni.

Congress sorkar lai khan Covid hi lo thleng ta se, eng dinhmunah chiah nge Mizoram hi kan awm ang tih te, kan chan a chauh turzia chu mi thil chikmite chuan an ngaihtuah ngam lo zawk a ni.

Dr. R.Lalthangliana hian Health Minister a nih angin Covid-19 thawm kan hriat phat aṭang khan nasa takin hma a la nghal a, lo invenlawk dan tur te, hri vei enkawlna tura ZMC leh CCC, 4C a tlawh tamziate chu sawiin a siak lo a. Vaccine kan hmuh theihna tur te, PPE hmanraw hrang hrang leh medical equipment hrang hrang Mizoramin kan hmuh theihna tura Central leh Foreign thlenga a dawr nasatzia hretu chu Mizo mipuite hi kan ni.

Health Department sum mamawh leh harsatna hrang hrang pawh Finance Minister, Chief Minister ni bawk Pu Zoramthanga hnenah thlenin, Chief Minister pawh Covid do nan a thil phal ṭhinzia hretute kan ni. Tunah pawh Covid do nana hmanraw pawimawhho neihsa a ṭha thawkhat rih tih tun hnai khan an puangzar zo chiah a ni.

ZMC-a RT-PCR test chungchangah pawh, a hmanrua neih kim loh lai a awm zauh tih loah chuan, a enkawltu leh hnathawktute ngei pawhin test sen loh inhnawkkhawm (backlog) a la awm loh thu an sawi a. RT-PCR khawl, a behbawm khawl dang tam tak ngai awm tel si lo, nasa taka tihfamkimchawp ngai chhuanlama an aupui fo pawh hi bansan ve tawh deuh sela an tan pawh a fuh tawh zawk.

RT-PCR khawl lawng lawng bun mai hi a har lo, a behbawm tifamkimtu ngaihtuah belh ngai tamzia leh hautakzia hi mipuiin an hai tawh bik lo.

Covid len tirh aṭanga vawiin thleng hian Dr. R.Lalthangliana hova Covid do dan tur te, hmalakna tawhna thlirho te, kan ram mamawh hrang hrang phuhrukna tur leh hripui laka kan ram kan him theihna tura meeting an neih tam tawhzia leh hah taka a zin chhuah nasatzia hretute kan ni. Health Minister-in a theih ang tawka a thawhrim dan leh hahzia hre reng chunga Covid pun zel chhanah MPCC media-ten an puh hi an party candidate turte vote hmuhna lam aiin, hnawhṭiauna tur lam a ni zawk mah awm asin, mipuiah an tla na vakin a rinawm lo.

Zep nak emaw, Covid len tirh aṭanga vawiin thleng hian thil ṭul leh tih tur pawimawh tiin, Health Minister hi zan dar 12 hmain a la mu hman ngai meuh lo asin. Hetia hri a pun zel chhanah Health Minister an puh daih hi 'a letlinga vut tui thlawr bel' tih ang chauh a ni e.

Covid donaah hian sorkar ang te, VLTF/ LLTF te, kohhran leh NGO te, mipui mimir hrim hrim pawh kan thawhhona a ṭha a, i ṭangrual zel ang u. Party party sawina hun leh inepna hun a ni lo tih hi Political Party zawng zawngte hian i hre mawlh teh ang u. Ruahmanna leh rawtna ṭha zawk thlen tur hre chuang si lo a, Vanapa Hall kawta mi tlemte insawm khawma lock down dodal huaihawttu awmchhun pawh kha Congress ṭhalai bawk an ni lawm ni?

Kan hripui dona kawngah hian thawktu hrang hrangte inpuhmawh tawnna tur dap mai lovin, hnam angin ṭangrual ila, thuneitute thuawihin ṭawngṭai bang lo bawk ila, min kiansan hun a la awm ngei ang.

R.Lalhmangaiha, Bethlehem veng