Good Friday-ah BJP an inluling em ni?

Whatsapp-ah hian lehkha pakhat hi a lo lang a, chutah chuan Manipur sorkar thuchhuah hi a lang a, Manipur sorkar-a Under Secretary (GAD) GS Max Guite thuchhuahah chuan, March 30, 2018 chu Good Friday ni mah se 'full working day' a nih thu a inziak a, ka rilru a kal thui ngei mai.

He thuchhuaha a tarlan dan chuan government office-te leh financial insti­tution hrang hrangte chu Good Friday hian chawl lova office hawng turin an ti a, an tih chhan chu March 31-a financial year tawp tur vanga inbuatsaih a ṭul vang a ni. Manipur ang tho hian Mizoram pawhin financial year tawp tur hi an hmachhawn ve dawn thova, Mizoram sorkar chuan thuchhuah siamin March 31, Inrinni hi hnathawh ni atan a puang ve thung a, Good Friday hi chu a pangngai anga chawlh mai tur a ni. He thil hian ngaihtuah a tithui a, "Hlauh ngah Mizo Kristian te" tia ngawih bo pui mai mai chi niin ka hre lo.

Thil thlir zau inti tam takte hian "Mizote hi hlauh kan ngah leh lutuk a," kan han ti thla zen a, hlauh tur dik tak pawh hlau lova kan awm chuan kan tana pawi tur thil hi kan tawng baw palh ang tih a hlauhawm ta hle niin a ngaih theih a, tun hnaia India rama Hindu ram din tumtu pawlte chet dan hi hlauh a hun tawh a ni. Tunlai hian Mizorama MLA inthlan a hnaih tawh avangin, "Hmasawnna kengtu an ni a, an hlauhawm lo," tiin kan han hnial vel pung pung ṭhin a, BJP leh BJP loh lam a ni lova, Congress leh Congress loh lam a ni lo, Mizoram state hmasawnna tur hi central sorkar-ah a innghat lo a, kan sakhaw himna hi kan dah pawimawh tur a ni.

Ka sawi tumah lut dawn ta ila, Manipur-ah hian BJP an sorkar tih kan hre awm e. Sorkar inṭawm an nei a, an sorkar hotu lu ber Chief Minister chu BJP a ni a, BJP sorkar tiin a sawi theih ang. Manipur hi state dangte ang lo takin Kristian tamna state a ni ve tho a, 41.29% lai hi kristian an ni. Heng mite ni pawimawh bera chhal ngama sorkarin office kal tur a ti hi chu sakhaw in rahbeh tumna a ni tih loh a harsa khawp mai a, hei hi sawi mawi kan la tum ṭalh a nih chuan kei chuan sawi mawi ngaihna ka hre lo.

He thil thlentirtu BJP tho hi Kristian-te ni pawimawh Krismas ni tak, December 25-a Good Governance Day puangtu kha an ni. Prime Minister hlui leh BJP hotupa Atal Bihari Vajpayee pian cham denchhena tih ni mah se, he ni lawm tur hian office kal turin sorkar hnathawkte chu tih an ni a, Kristian-te tan an sakhaw ni pawimawhah office kai a ngai a nih chu. Kum 2014 khan he Good Governance Day hi hman ṭan a ni ta a ni. Kum 2017 khan Good Friday hi Digital India Day-ah a puang tawh tih kan la hre bawk ang. Kristian ni pawimawhah chat chat zel ni phuahchawp, tun hmaa awm ngai lo an puan belh zel a ni.

Krismas-a sikul naupang leh sorkar office hnathawkte kal tura titu BJP sorkarna state Manipur-a Good Friday tak mai 'working day' anga an puan thu an han chhuah mai hian India rama Kristiante a nghawng na nghal hle mai a, Manipur-a kristian pawl hrang hrang pawhin an dodal a, na takin sorkar hi an bei nghal a, sorkar hian Good Friday-a chawlh a puan hi a sût leh emaw sût leh ta lo pawh ni se, BJP hnuaiah Kristiante nek chep an ni ti ila tunge min hnial thei ang?

Hei vang hian kan sakhaw humhimna atan Mizoramah BJP leh a kaihhnawih hi vulh lian ve lo ila, chu chu politics-a midang hamṭhatna tur lam ni lovin kan sakhaw himna atan a ni. Tunlai hian Mizorama pa fing ve deuha ngaih ṭhenkhat chu BJP hian an sawm mek a, BJP hi huat tur a ni lova, an kalphung en hian Kristian sakhaw tana him lo a nih vangin vulh lian lo ila, thawhpui lem lo ila, state dangah an lo lian a nih pawhin kan state-ah lian ve lo se a ṭha mai awm e.

Tichuan, BJP central-a an sorkar chhung chu Mizorama BJP thlawptu sorkar din a ṭha tia sawi ṭhinte hian central-a Congress an sorkar chhung zawnga Mizorama Congress an sorkar khan duhsakna kan dawng lo tih kan hmu tawh a, Mizoramah hian BJP emaw Congress pawh sorkar se central hian min duhsak phak dawn lova, min duhsak loh phah bawk hek lovang.

Krismas-a min tibuai tawhtute'n ṭhenawmah Good Friday chu hnathawh ni atan an puang leh a, an sût emaw sût lo emaw an puan hnan hmiah duh danah hian Kristian tan chuan ngaihdan siam fel mai tur a ni.

Lal Muanpuia